SOE BEBE, LAIHA MORAL NUDAR INAN HO AMAN

Padre Paroquia igreja Santo António Baucau, Justiniano de Sousa afirma, wanhira feto ho mane kuda domin ba malu to’o hetan bebe ne’e sai hanesan grasa Maromak nian, maibe tanba deit moe hodi estraga bebe, ne’e sala bo’ot no laiha moral nudar inan ho aman, tamba ne’e oho ema.

Padre hatutan, igreja universal sempre porteje no defende  moris, basa moris ne’e nia hun mai husi Maromak liu husi familia ida, maibe, atitude hirak ne’ebe joven barak hatudu ne’e, sira hakarak senti nia furak, maibe laiha moral atu responsabiliza.

 “Labarik  ida  ne’ebé  moris  mai  iha  mundu  ne’e  labele  moris  arbiru, tamba  ho  razaun  ida  ne’ebé  la  kona  ho  nia  konsensia, nune’e bele mosu soe bebe arbiru no la konsidera sai hanesan grasa  ida  ne’eb’e  mak  Maromak  nian  ba iha familia,”dehan Padre Justiniano  de  Sousa ba JN-Diário iha semináriu Minor Balide Dili, Kuarta (20/7).

Tuir Padre Justiniano, konsikuensia soe bebe ne’e mai husi  moris  livre, sexual livre no moe atu iha oan, tamba  ne’e  parte  igreja  fo  hanoin  ba  joven  feto  ho  mane  katak, wanhira  hetan  oan  labele  hanoin  uluk  estraga, tamba  mane  la  responsabilide, maibé  tenki  tur  hamutuk  hodi  buka  nia  solusaun.

Parte seluk mos, tamba kondisaun ekonomia, basa dok husi  inan  aman  no  influensia  husi ema sira seluk, dala ruma  sira  monu, nune’e atu halo desizaun hodi defende labarik  ne’e defisil.

“Problema  soe  bebe  ne’e  sei  halo  inan  aman  ida  ne’ebé  laiha  moral  ne’e  la  hakmatek  iha  sira  nia  moris,  ne’ebé  parte  husi  fiar  nia  orientasaun  no  sei  hasoru  justisa  iha  maromak  nia  oin, tamba  bebe  ne’e  sai  hanesan  prezente  Maromak  nian  ba  iha  familia  ida  nia  laran  entre  mane  ho  feto  ida,”tenik nia.Tos

Jornal Nacional