KOMUNIDADE HUSU XANANA BLACKLIST KOMPAÑIA LAIHA KUALIDADE

Komunidade Suku Camea, Postu Administrativu Cristo Rei, Munisípiu Díli, ejiji ba eis Primeiru Ministru, atual Ministru Planeamentu  Investimentu Estratéjiku (MPIE), Kay Rala Xanana Gusmão atu blacklist kompañia sira ne’ebé durante ne’e halo projetu ba Estadu laiha kualidade.

Komunidade José Ximenes husi Suku Camea dehan,  Dezenvolvimentu iha Timor ne’e, laiha kualidade, tanba falta kontrolu husi MOP ho ADN laiha, hodi halo Governu fakar osan saugati de’it.

“Kompañia sira ne’ebé halo projetu laiha kualidade, tanba sira uza fali rai henek hodi tau fali ba estrada. Ami ko’alia ona ho maun Xanana no husu ba nia atu hasai kedas, kompañia sira ne’ebé kaer projetu laiha kualidade,” katak José Ximenes ba Prezidenti Repúblika (PR), Taur Matan Ruak, bainhira Xefi Estadu ne’e halo dialogu komunitária ho povu iha Suku ne’e, Kinta (21/12).

Nia hatutan, ADN ho MOP bainhira ba halo kontrola ba projetu sira ne’e, sira nunka besik atu haree kualidade projetu ne’e, sira iha de’it kareta laran, tanba ta’uk rai rahun kona sira.

“ADN ho MOP, Sira hamrik dok mak fihir, liman tau ba bolsu liu fali Prezidenti,” lamenta nia.

Hatan ba preokupasaun ne’e, PR Taur Matan Ruak dehan, kualidade projetu ne’e iha problema bo’ot duni.

“Tebes duni, ita iha problema, i ha’u triste los, tanba ohin loron ita iha engeneiru barak, maibé buat hotu la dura, ita tenki iha hanoin katak, osan oituan ne’ebé mak ita iha, ita tenki uza ho di’ak,” dehan Taur Matan Ruak.

Xefi Estadu ne’e hatutan, ida ne’e problema ida ne’ebé liga ho Timor oan  nia mentalidade no domin ba nasaun.cos

Jornal Nacional