TENTA HAKANEK MEMBRU POLISIA HO RAMA AMBON

Polisia Nasional Timor Leste detein joven ida iha sela Polisia Kaikoli iha Sabado 24/12) kalan tamba tenta tiru rama ambon ba membru polisia eskuadra Nain Feto iha Largo Bidau Lecidere, Díli.

Polisia kaptura autor ho evidensia rama ambon ne’ebe ninia prosesu dadaun nee submete ba desizaun Tribunal hodi haree ba tipu krime ne’ebe autor ne’e komete.

“Nia halo asaun ne’e tentativa para hakanek ou oho ita nia polisia, evidensia hotu-hotu iha kaptura kedas nia iha momentu ne’eba no prende rama ambon tolu iha suspeitu nia pasta laran ne’ebe tenta atu hasoru polisia,”informa Segundu Komandante Polisia Munisipiu Dili, Superintendenti Assistenti Polisia, Euclides Belo, ba Jornalista sira iha ninia knar fatin, Caicoli-Dili, Kuarta (28/12/2016).

Nia hatutan, sidadaun sé deit mak lori kroat polisia identifika autor ne’e sei lori ba prosesu, tanba evidensia ne’ebe mak sira lori ho intensaun atu halo asaun krimi ou atu hakanek ema ruma.

Nune’e, nia parte husu ba komunidade hotu atu hato’o informasaun liu husi liña kontaktu karik identifika pessoal balun ne’ebe lori sasan kroat, informa lalais ba polisia hodi kaptura no prende evidensia sira ne’e.

Euclides sublinha, hafoin polisia hala’o investigasaun durante 12 oras, kazu ne’e intrega kedas ba Ministeriu Publiku (MP) no autor ne’e detein hela iha sela polisia Caicoli, maibe nia parte rezeita fo sai autor ninia identidade.

Joven ida mate iha Becora kauza asalta malu

Iha oportunidade ne’e Segundu Komandante Polisia Munisipiu Dili, Superintendenti Assistenti Polisia, Euclides Bel hateten, kazu joven ida mate iha Suku Becora-Dili iha loron 21 Dezembro foin lalais ne’e kauza husi asalta malu entre jovens sira.

PNTL hala’o ona preeliminasaun iha fatin akontesimentu no rezultadu husi parte polisia nian identifika kauza ne’e mosu tanba kauza asalta malu entre joventude hodi hamate joven Aderito Soares.

“Kazu ida Becora iha Aldeia Haslaran kazu asalta malu ne’ebe rezulta sidadaun ida mate, nia prosedimentu prosesu la’o hela husi komando distritu dili parte investigasaun kriminal nian ba suspeitu sira,”afirma Euclides Belo.

Nia hatutan katak, husi prosesu ne’e polisia komando distritu dili kontinua buka tuir  suspeitu balun ne’ebe mak kontinua subar. Tanba ne’e husu ba parte familia ne’ebe mak sei kontinua subar suspeitu balun tenke kopera ho polisia hodi mai kumpri prosesu legal ne’ebe iha tuir lei.

“Tanba wainhira  kontinua subar parte polisia mak hetan ninia prosidementu oin seluk liutan, sira ne’ebe kontinua subar polisia kontinua buka tuir tanba iha ona mandadu kapturasaun,”tenik nia.

Maibe, tuir nia katak, polisia kaptura ona suspeitu nain 10 detein ona iha sela polisia entrega ona ba nain husi prosesu hotu Ministeriu Publiku (MP) no suspeitu nain sia lori ona Tribunal.

“Husi suspeitu nain 9 ita kaptura, ohin (horseik-red) ita kaptura tan suspeitu nain ida ho inisial ‘M’ agora detein hela iha sela polisia hodi kumpri 72 horas de tempu, depois mak foin lori ba tribunal,”esplika nia. Eus

Jornal Nacional