VETERANUS MAK TERUS, EMA SELUK MAK GOZA PV

Veteranus sira la kontenti ho lei Pensaun Vitalisia (PV), tanba sira mak terus durante tinan 24 hodi liberta rai no povu Timor Leste, maibé to’o ikus ema seluk mak goza fali independensia ne’e.

Veteranu Funu Lakan, husi Suku Hera, Postu Administrativu Cristu Rei, ejiji Parlamentu Nasionál atu halakon tiha lei pensaun vitalisia ne’e.

“Ami veteranus sira sei moris terus no ki’ak hela, ami lahetan buat ida, ema balu mak hetan fali pensaun vitalisia. Ami husu ba Prezidenti Repúblika, konaba lei vitalisia, tanba ami haree katak, vitalisia ne’e, habokur grupu oan ida de’it,” katak veteranu Funu Lakan, ba PR Taur Matan Ruak, liu husi dialogu komunitária Xefi Estadu ne’e nian iha Suku Hera, Tersa (20/12).

Alende ne’e, nia mós husu ba PR Taur Matan Ruak katak, aban bainrua tama iha vida polítika karik, tenki tau matan ba povu tomak iha Timor Leste.

“Prezidenti Repúblika rasik  dehan, ita bo’ot gosta polítika, tanba ne’e, ami husu se aban bainrua tama polítika karik, tanki tau matan ba povu Timor Leste tomak,” relata veteranu ne’e.

Hatan konaba preokupasaun ne’e, PR Taur Matan Ruak dehan, pensaun vitalisia ne’e, maioria iha Timor larna ne’e, hakarak ko’a tiha, maibé Parlamentu Nasionál iha nia pozisaun, no Governu mós iha nia pozisaun, i Prezidenti respeita sira.

“Ita labele obriga orgaun Estadu ida atu tuir ita nia hakarak,” katak Xefi Estadu ne’e.

Konaba vida polítika, Taur Matan Ruak rekuñese katak, nia gosta duni polítika, maske foin mak primeiraves nia tama iha polítika.

“Ha’u nia vida mai polítika ne’e, foin mak primeiraves, maibé ha’u gosta fali polítika, tanba ne’e ha’u sei mate ho polítika. Ita labele so’e hela ita nia rai, tanba ita hotu terus, buat ne’ebé ita seida’uk halo, ita sei halo hamutuk, imi konta ho ha’u nia apoiu,” dehan Xefi Estadu ne’e.cos

Jornal Nacional