DESKONFIA FÁBRIKA RAMA AMBON IHA DILI, PN PRODUS LEI KONDENA ARTEMARSIAIS

Parlamentu Nasionál (PN) identifika ona fábrika rama ambon iha Dili laran, ne’ebé kada loron produs rama ambon ne’e ho kuantia bo’ot tebes.

Deputada Virgina Ana Belo, husi bankada CNRT hatete katak, PN presiza aselera lei kona ba artemarsiais no rama ambon nian hodi bele hapara atividade sira ne’e, no hapara violensia.

“Buat ne’e (rama ambon), la’os produs oituan, tanba mesmu la’os fábrika bo’ot, maibé rama ambon nia produsaun ne’e iha fatin barak ho ninia kuantia barak tebes,” relata Virgina Ana Belo iha Parlamentu Nasionál Kinta (23/01).

Nia hatutan, Polisia Nastionál Timor Leste foin dadauk ne’e, kaptura sasan kro’at sira ne’e iha fatin balu iha parte balu husi Dili ninian.

“Lei konaba krimes de fabrika, liu-liu rama ambon, ha’u hanoin importante para ita bele aselera ida ne’e. Tanba agora dada’uk ne’e, situasaun iha parte balu iha sidade Dili ne’e, ema barak sei la’o nafatin ho armas ida ne’e, ameasadu tebes ba ema sira ne’ebé iha asuntu balu atu trata iha kalan,”katak Ana Belo.

Tanba ne’e, nia husu ba deputadu hotu iha Parlamentu Nasionál atu fó importansia ba lei ida ne’e, hodi bele resolve tiha problema ne’e.

Alende ne’e, deputadu Eladio Faculto husi bankada FRETILIN mós lamenta katak, joven sira ikus ne’e, la konsentra ba estuda, maibé konsentra ba buka baku malu de’it.

“Ha’u hanoin Governu tenki haree ida ne’e, tanba saida mak iha fenomena ida ne’e, konflitus orizontal entre grupus artemarsiais kontinua, mesmu ita estabelese ita-nia lei no ita-nia orden para depois bele hakalma joven sira labele baku malu,” relata Eladio.

Joven sira mak halo desizaun ba sira nia-an rasik hodi ba asalta malu, no duni malu tama to’o ema nia uma laran.

Alende ne’e, Prezidenti Parlamentu Nasionál, Aderito Hugo da Costa, dehan, rezolusaun taka  artemarsiais ne’e, agora dada’uk rezolusaun artemarsiais nian  transfere ona ba lei.

“Tanba kaer tiha, lori ba prosesu labele halo andamentu, tanba laiha kobertura lei ne’ebé forte, agora duni lei ida ne’e atu fó solusaun,” dehan Aderito Hugo.

Lei atu regula artemarsiais sira ne’e, Segunda semana kotuk (23/1/17),  Prezidenti PN baixa ona ba komisaun A hodi halo diskusaun.

“Ita haree iha tinan rua, rezolusaun ne’e implementa laiha forsa sufisiente, entaun solusaun mak agora lei iha komisaun A,”katak Aderito.cos

Jornal Nacional Diário