segunda-feira, 30 de janeiro de 2017

EDIFISIU CNE KUALIDADE TUIR PADRAUN INTERNASIONAL, PM RUI HO MPIE XANANA ORGULHU

PARTILHAR

Primeiru Ministru (PM), Rui Maria de Araújo ho Ministru Konselheiru nu’udar mos Ministru Planeamentu Investimentu Estratéjiku (MPIE), Kay Rala Xanana Gusmão, Sabadu (28/1/2017), ofisialmente inagura edefisiu foun Comissão Nacional de Eleições (CNE) ne’ebé nia kualidade tuir padraun internasional.

PM Rui ne’ebé akompanha husi Xanana Gusmão, Prezidente CNE, Alcino Barris, Director kompanha ATRAMOR Sucsesso, Raul Lemos, koa fita nudar sinal inagurasaun edefisiu foun nian ne’ebé tuir mai kedas  ho ritual bensaun husi Padre Tito Fernandes.

Prezidente CNE, Alcino Barris sente kontente tebes tanba edefisiu CNE ho kualidade diak tebes no estandar internasional.

“Edefisiu foun ne’e principal tebes no benefisiu ba povu no principal liu ba CNE,” hateten Prezidente CNE, Alcino Barris iha ninia intervensaun.

Prezidente CNE,  Alcino Barris haklaken katak, atu halo konstrusaun ba edefisiu refere iha kompanhia lubuk ida mak kompete, Gunug Kijang, Monte Veado, inklui mos  ATRAMOR Sucsseso, no kompanhia seluk tan, husi kompanhia hirak ne’e ikus mai iha desizaun husi Konselho Ministrus hatudu ATRAMOR mak sai the best one ho valor kustu inisial ba konstrusaun edefisiu US$  2.699.999.99 centimus.

Iha loron 16 Marsu 2011, asina kontratu entre Prezidente CNE, Fautino Cardozo, atual Prezidente KFP no Kompanhia ATRAMOR  husi ninia Direktur rasik, Raul Lemos.

Iha loron 15 Abril 2011, lansamentu ba primeira pedra ba inisiu konstrusaun edefisiu CNE. Iha loron 23 Novembro 2011 asina dokumentu alterasaun ho kustu adisional US$ 202.32,25 tanba kontazen ba konstrusaun pilares.

Depois iha tinan 2012 asina kontratu aumenta tan ba extensaun kontratu to’o 28 Fvereiro 2013 to’o iha 28 Fevereiro 2014, iha loron 9 Julho 2014 extensaun kontratu to’o 31 Julho 2014 no valor adisional  US$ 208.849,42 Centimos, ne’ebé total hamutuk  US$ 3.103.481,75 centimus.

Iha loron 27 Dezembro 2016 asina tempu de intrega husi Kompanhia ATRAMOR ba iha CNE. Husi edefisiu ida ne’e maka iha tinan 2017 CNE hahu halo estruturasaun ba kargus diresaun nivel nasional no municipius.

“Defaktu konstrusaun edefisiu ne’e lori prosesu naruk, maibe  kompanha no kontrator konsege finaliza projeto ne’e ho kualidade tuir padraun internasional no CNE sente orgulho ho kompanhia Atramor Susesu,”   hateten Alcino Barris.

Iha fatin hanesan, Ministru MPIE  Xanana Gusmão, hato’o votus trabalho ba Prezidente CNE no Komisariu sira nune’e mos funsionarios tomak CNE nian.


“CNE hanesan uma demokrasia, ne’ebé hau hato’o botus de bom tabalho ba Prezidente CNE no komisario sira, tanba iha tinan 2017 importante teb-tebes iha ita nia prgresu konstrusaun Estado, iha loron 20 Maio 2017 mak ita foin halo tinan 15, ita tenke kontente, hau hare rai barak ukun an tinan 60 ona, mais Estado laiha, demokrasia laiha,” dehan Xanana Gusmão.

Eis Primeiru Ministru ne’e rekonhese katak, konstrusaun ba edefisiu CNE ne’e hasoru difikuldades oi-oin, hanesan be, foin ke’e hetan kedas ona be, tanba ne’e maka difikulta teb-tebes serbisu.

“Dala ruma deputados sira ketiona kona ba kosntrusaun ba edifisiu ne’e, maibe durante hau akompanha hasoru difikuldades barak, tanba be, foin ke’e oitoan be ona, be iha povu nia uma ladun iha, tanba hau la’o haleu Dili laran hau hare be gasta liu ba fase motor no kareta barak, be sira ne’e maka halai mai hotu iha fatin ne’e,” dehan Xanana.

Nia hatutan, la’os deit atrazu tanba kestaun be, maibe iha mos empreza nian, tanba ne’e husu nafatin ba emprezarios sira presija halo exercicio boot.

Maske hasoru difikuldades, maibe Xanana kontente tanba bele finaliza no halo inagurasaun.

Iha fatin hanesan Direktur Kompanhia ATRAMOR Sucsesso, Raul Lemos, ne’ebé akompanha husi nia kaben Krisdayanti, hato’o  agradesementu ba apoiu eis Primeiru Ministru Kayrala Xanana Gusmão durante konstrusaun ba edefisiu Comisaun Nasional Eleisoens (CNE) nian durante ne’e.

“Hau laiha liafuan atu koalia, maibe hau hakarak atu fo agradese no obrigado ba primeiru Ministru, ho membru parlamentu sira tanba bele partisipa ona iha seremonia inagurasaun ida ne’e, li-liu hau hato’o agradesementu ba maun boot Kayrala Xanana Gusmão iha tempu ne’eba hanesan primeiru ministru, iha tempu ne’eba ami hasoru difikuldade todan teb-tebes, maibe nia lataka matan ba ami, sempre fo suporta, ne’e katak nia lakohi emprezario nasional atu monu,” hateten Raul Lemos.

Krisdayanti nudar mos diva Pop Indonesia nian hato’o mos sentimenti kontente ne’e wainhira hananu muzika iha seremonia inagurasaun ne’e.

Seremonia inagurasaun ne’e hetan partisipa husi Primeiru Ministru, Rui. M. Araujo, Ministru Konsileiru, Xanana Gusmão, membru PN, direktur Polisia Cientifika Investigasaun Criminal (PCIC), Vicente Brito, Provedor Dereitos Humanus e Justisa (PDHJ), Silveiro Pinto, prezidente Komisaun Funsaun Publiku (KFP), Faustino Cardozo, Prezidente Komisaun Anti Korupsaun (KAK), Aderito Tilman, reprezentante sociedade civil, reprezentante PNTL, reprezentante partidus politikus, komisarios CNE no funsionarios. Nune’e iha seremonia refere lamarka prejensa husi memembru Governu. mia

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: