terça-feira, 31 de janeiro de 2017

GOVERNU SEI HAREE AKORDU HO FUNDASAUN REAL MADRID

Sekretariu Estadu Juventudi no Desportu (SEJD) Leovigildo Hornai informa katak depois enkontru three parte entre Federasaun Futebol Timor Leste (FFTL), Liga Futebol Amadora (LFA) no klubu sira depois maka Governu sei hakat ba Spanyol hodi haree akordu ne’e.

“Ha’u hanoin ita iha prioridade asuntu ne’ebé tenki trata, tanba ne’e ami planu enkontru ho FFTL, LFA no klubu sira hodi hetan ideia, solusaun ba planu sira ne’e hotu depois maka ami sei hakat ba iha Real Madrid hodi haree akordu ne’e,” dehan Leovigildo Hornai iha nia knar fatin SEJD, Segunda (30/01/2017).

Nia esplika liu tan, akordu ne’e atu habelar liu tan deit koperasaun ne’ebé iha tiha ona, reforsa tan LFA iha laran, tanba ne’e maka artigu ida ne’ebé ho kauza ne’ebé koalia konaba papél no ezisténsia LFA nian iha kooperasaun no âmbitu akordu ne’e.

“Ha’u halo ona distribuisaun momentu ne’e ba Prezidenti LFA, ho sira nia ekipa hodi haree konaba pozisaun intensaun sira nian hakarak husi kooperasaun ida ne’e, para depois ita haree hamutuk halo formulasaun ida di’ak ba ita nia versaun rasik para depois ita lori ba fundasaun Real Madrid,” informa Leovigildo.

Nia dehan tan, loloos akordu ne’e la’o ona iha fulan ida ne’e mas tanba iha asuntu internu ne’ebé presiza fokus maka Governu rona ona LFA, klubu no FFTL tanba ne’e enkontru three parte ne’e tenki realiza hodi diskuti ba kongresu FFTL nian.

“Hanesan ita hatene sira expo Vise Prezidenti no Sekretariu Jeral FFTL sira mai koalia iha ne’e, maske atual ne’e Prezidenti la mai tanba sei halo tratamentu iha Singapura, sira halo kontaktu ho Presidente FFTL no aseita kona ba hanoin, ideas ne’ebé sira mai koalia iha ne’e,” dehan nia.

Governante ne’e mós hateten tan katak, akordu ho fundasaun Real Madrid ne’e tanba Timor iha memoria instituisional katak Timor iha akordu antes, buka atu follow up di’ak liu tan akordu ida ne’e para iha nia konsistensia ho nia memoria instituisional ida. Segundu hakarak reintera katak akordu ne’e iha nia mudansa tanba hakarak hatama mós LFA, husi parte fundasaun Real Madrid mós asieta tanba maske liga ne’e ho karakter Amador maibé ba futuru hakarak dezenvolve liga sai liga ida ne’ebé iha pristiju.

“Ami mós hanoin atu liu ba Sporting, Benfica ho sira seluk hodi buka gaña esperensia konaba liga ne’e rasik,” dehan nia.nes

Jornal Nacional Diário

Sem comentários: