segunda-feira, 30 de janeiro de 2017

Kalendáriu ba Eleisaun Prezidensiál sira ne’ebé publika ona husi STAE

PARTILHAR
Ministru Estadu no Prezidénsia Konsellu Ministru no
Portavós Ofisiál Governu Timor-Leste

Dili, Loron 27 fulan-janeiru tinan 2017

Tuir Dekretu Prezidensiál loron 16 fulan-janeiru nian no tuir nia obrigasaun jurídika sira, Sekretariadu Tékniku Administrasaun Eleitorál [STAE] publika ona kalendáriu eleitorál ba eleisaun prezidensiál iha eleisaun sira oinmai.

Eleisaun Prezidente Repúblika Demokrátika Timor-Leste nian ne’e sei hala’o iha loron 20 fulan-marsu tinan 2017.

Rejistu kandidatu sira nian hahú ona iha loron 17 fulan-janeiru no sei remata iha loron 5 fulan-fevereiru. Kandidatu sira tenke rejista an liuhosi Prezidente Tribunál Rekursu no husu ba sira atu hakbesik an ba STAE ka ba Tribunál Rekursu atu hetan informasaun liután.

Hafoin prosesu verifikasaun no apresiasaun elejibilidade nian, ne’ebé inklui prosesu rekursu nian ida, Tribunál sei fó sai lista husi kandidatu sira ne’ebé admitidu ba STAE no ba Komisaun Nasionál Eleisaun sira nian (KNE) iha loron 18 fulan-fevereiru tinan 2017. STAE sei fó sai kandidatu sira ba públiku, entre loron 19 no loron 21 fulan-fevereiru.

Períodu kampaña eleitorál nian sei hahú iha loron 3 to’o loron 17 fulan-marsu tinan 2017.

Hafoin votasaun iha loron 20 fulan-marsu, KNE sei publika rezultadu nasionál provizóriu nian sira entre loron 26 no 28 fulan-marsu.

Bainhira rezultadu finál sira eleisaun nian iha loron 20 fulan-marsu publika ofisialmente ona, iha loron 2 fulan-abríl, iha Jornál Repúblika no verifika karik katak laiha kandidatu ida ne’ebé simu ona votu válidu liu metade husi númeru totál votu válidu sira, sei hala’o eleisaun ba volta daruak nian iha loron 20 fulan-abríl tinan 2017, iha ne’ebé kandidatu na’in-rua ne’ebé maka hetan númeru votu boot liu iha ronda dahuluk ne’ebé aprezenta an ba eleisaun, bainhira, entre sira ne’e laiha ida maka sai husi sira-nia kandidatura.

Sekretariadu Tékniku Administrasaun Eleitorál nian, ho apoiu husi Governu no parseiru sira hahú ona kampaña nasionál ida atu fahe kalendáriu ba sidadaun sira no hodi insentiva sira-nia partisipasaun.

Portavós Governu nian, Ministru Estadu Agio Pereira, hatete ona katak “liberdade atu ezerse ita-nia direitu demokrátiku sira ita manan ona ho folin boot. Períodu eleitorál ne’ebé mak ita tama daudaun, iha ambiente ida ne’ebé hakmatek, organizadu no pasífika, períodu ida ne’ebé ita tama ho orgullu no propózitu, ita konsidera liuhusi esforsu ita-nia asuwa’in sira nian ne’ebé liu uluk ona ita”. REMATA

Governo Timor-Leste
PARTILHAR

Author: verified_user

Publicação luso-timorense sem fins lucrativos

0 comentários: