Kompetisaun LFA Segunda Époka Hala´o iha Estádiu Baucau no Maliana

DILI (ANTIL) - Komisaun Liga Futeból Amadora (LFA), Kinta (29/12) iha Hotel D´City, Vila-Verde, Dili, ofisialmente desidi ona atu hala´o kompetisaun LFA iha Estádiu Munisípiu Baucau no Maliana (Bobonaro). Estádiu Munisipál Dili seidauk bele utiliza tanba iha hela prosesu rehabelitasaun nia laran.

“Hafoin loron boot Tinan Foun, ekipa LFA sei ba halo koordenasaun ho Prezidenti Autoridade Munisípiu Baucau no Bobonaro no Komandu Polísia Munisípiu rua ne´e, organizasaun juventude no mós veteranu sira para iha koordenasaun ida hamutuk nune´e jogu ne´ebé atu hala´o ne´e sai efetivu,” dehan Sekretáriu Ezekutivu LFA, Sergio Hornai ba ANTIL via telefónema bainhira viazen hosi Dili ba Liquiça, Sesta.

Nia esplika, tuir planu, iha semana ida nia laran sei iha jogu haat—jogu rua sei hala´o iha Baucau no jogu rua seluk sei hala´o iha Maliana. “Iha tempu besik ami sei halo reuniaun ho klubu sira kona-ba preparasaun jogu ne´e,” Hornai informa.

LFA mós desidi katak inskrisaun ba jogadór sira iha klubu hahú iha 31 Dezembru 2016 to´o iha 31 Janeiru 2017. Jogu ba époka segundu hala´o iha entre 4-17 Fevereiru 2017.

“Sei la materializa jogu ne´e ba iha ekonomia de´it maibé oinsá lori natureza jogu LFA ba iha komunidade. Konserteja ita sei koordena ho autoridade sira para oinsá mobiliza adeptu sira atu asisti jogu ne´e,” atuál defensór públiku ne´e haklaken. (Jornalista: Xisto Freitas/Editor: Otelio Ote)