KONTRA PENSAUN VITALISIA…!!!

Jornal Nacional, editorial

Presidente Republika, Taur Matan Ruak deklara ona sei veta Lei Pensaun Vitalisia (LPV) tamba ema balu nebe uluk tempo resistensia lakohi hakarak ukun rasik an mos hetan pensaun boot liu fali ema sira nebe sakrifika sira nia an tomak ba indepndensia Timor Leste nian.

Lei Pensaun Vitalisia anterior, eis titular sira membru governu, deputado Parlamento nasional no eis Presidente Republika simu pensaun 100%, hanesan fali ho titular ativu, tan nee mosu kritika publiku hodi deputado sira altera ba 60 – 90%, ezeptu eis Presidente Republika mak mantein pensaun 100%.

“ Hau nia pozisaun politika iha fatin hotu hotu hau hatete iha parlamerntu , hau kontra lei Pensaun Vitalisia tamba iha balu ke la halo buat ida, mas manan li fali hau nia grilleru sira “ Tau Matan Ruak, publikasaun JN-Semanario edisaun 28 Janeiru.

Los duni senhor Presidente Republika, ema nebe uluk lakohi ukun an mak ohin loron halo ahi los, buka halai tun sae, tama sai partido hisoriku sira, tabele lider historiku sira hodi hetan fatin iha Parlamento no Governu, depois manan osan boot liu fali veteranu Falintil sira nebe funtu  tinan 24.

Veteranos Falintil, tinan 24 dedika sira nia an tomak ba ukun, ikus mai Lei Pensaun ba Veteranu sira balu simu minumu 276 USD kada fulan membru Parlamentu no membru governu sira tinan lima deit, tuir LPV nebe seidauk altera, simu  1500 – 4500 USD , nee injustisa no diskriminativu.

Agora LPV membru parlamentu altera tiha nee mos halakon deit regalias balu tamba lei anterior nian eis titular sira nee hetan antendementu espesial, laos eis titular  deit, maibe familia tomak, fen no oan hetan fatin espesial iha rai doben ida nee.

Lei alteradu nee mos tuir sosiedade sivil sira ninia observasaun katak LPV alteradu nee kestaun matematika deit maibe PN altera lei ida hodi hamosu artigu balu iha lei nee hodi asegura an, ‘ direitu ‘arkeridu’.

LPV veta mak Parlamento sei bele re-abertura alterasaun nee tamba aletrasaun LPV nee laos passa ho votus unanimidade. Agora Presidente Republika veta mak lei anterior sei vigor nafatin too iha dezisaun final promuglasaun lei foun husi xefi Estadu.

Publiku apresia pozisaun Presidente Republika nian, diak liu LPV nee halakon tiha tamba bele hamosu injustisa sosial iha rai laran. Ema nebe uluk lakohi ukun an, goza liu fali ukuan nee, enkuantu ema nebe uluk terus ba rai nee ukun an, kontinua terus.

Presidente Republika iha resposnabilidade moral atu veta lei pensaun vitalisia nian tamba Presidente Republika defende prinsipiu ida “ uluk fakar ran ba ukun rasik an, agora hikis kosar ben ba moris diak”, ema hotu tenki servisu makaas mak bele moris diak, laos tur- tur deit, moris diak deit ho Pensaun Vitalisia.

Kontra Lei Pensaun Vitalisia nee, laos Taur Matan Ruak deit maibe eis komandate FALINTIL, Lerer Anan Timur  mos kontra lei nee tamba razaun nebe hanesan, ema sira nebe lakohi ukun an nee mak manan osan boot liu fali veteranu eis FALINTIL sira.

Ne’ebe diak liu, halo lei ida hodi tau matan uluk lai eis FALINTIL sira nee, oan kiak feto faluk FALINTIL sira nian, duke halo lei ba defende uluk intrese ba an rasik mak ikus mai sai perokupasaun publiku.

Lei pensaun vitalisia atu halokon nee mos tamba kesatun sustetabilidade ekonomia nasaun nian tamba tinan lima- lima eis titular aumenta ba be- beik, ne’ebe tinan 20 tan, OGE nee kuaze atu selu hotu deit ba Pensaun eis titular sira orgaun soberanu nian. *