domingo, 26 de fevereiro de 2017

AIFAESA Identifika Loja Xineza Komete Infrasaun

PARTILHAR
DILI, (ANTIL) – Serbisu Autoridade Inspesaun no Fiskalizasaun ba Atividade Ekonómika, Sanitária no Alimentár, Instituisaun Públika (AIFAESA, I.P)  apreende (foti) produtu barak husi loja xineza iha parte Bekora no Komoro nian.

Inspetora AIFAESA, Madalena Sarmento ba ANTIL iha Sesta ne’e, sasán ne’ebé apreende prosesu hotu ona no konvoka hamutuk ho loja na’in no asina tiha ona auto. Maibé iha na’in balun ne’ebé seidauk mai no sasán ne’ebé foti ne’e sei rai iha fatin operasaun nian atu hatudu ba loja-na’in katak sasán ne’ebé foti husi sira-nia fatin.

Sasán ne’ebé komete infrasaun ne’e hanesan, Coca-Cola lata no botir, Fanta, Serveja, Mantega ho marka Blue Band, Paun Rahun, Biskuit Gabind, Cokolate, Tic-Tac, Dancow no makanan ringan sira seluk ho marka letra Xina.

“Infrasaun barak ne’ebé hetan maioria iha loja Xina iha parte Bekora no Komoro, husi parte restaurante nian mak sasán temperus ne’ebé hodi tein, depois iha loja balun foti serveja no ai-fuan lokál hanesan ai-nanas”, Madalena relata iha Matadouru.

Iha fatin hanesan, koordenadór AIFAESA, Abílio Oliveira esplika lejislasaun, bainhira foti sansaun ba loja sira komete infrasaun dala-tolu bele hetan enseramentu temporáriu to’o bele korrije sira-nia án.

“Antes atu to’o ba iha  ne’e, ita esplika ba sira kastigu saida mak sei akontese sé sira halo beibeik. AIFAESA tenke rejista sansaun sira ne’e no sansaun dala hira ona mak ita foti ba sira. Iha lejislasaun dekretu lei 23 ne’ebé aprova rejime infrasaun hatete, sé sira mak hetan sansaun dala-tolu entaun bele hetan sansaun asesória. AIFAESA hatún despaixu ida para taka atividade ne’e bele fulan-ida, rua ou tolu”, Abílio subliña.

Bainhira liu fulan tolu mak loja sira kontinua nafatin bele taka para sempre tanba hetan sansaun asesória makás ona. Maibé, atu foti sansaun bele mós fó multa ka koima ne’ebé ho kuantidade $1000.

Abílio hatete, Timor-Leste maioria importa sasán mai husi rai liur no sasán liu prazu ne’e  sempre iha beibeik bainhira to’o no liu de’it semana ida expire ka estraga ona.

“Ita atu halakon mós susar, ita bele redús. AIFAESA nian forsa ida mak tenke halo prevensaun, esplikasaun, divulgasaun makás ba konsumidór sira para bele hatene, ita-nia nasaun ne’e laprodús sasán sira ne’ebé ita han, barak liu mai husi liur no kuandu hola tenke haree didi’ak”, katak tan.

Nia husu atensaun ba inspetora sira tanba sasán sira ne’ebé to’o iha ne’e, sira troka prazu. Maibé ida ne’e instánsia sira seluk liuliu Alfándega, Quarantena  sira mós fó atensaun no la-kle’ur AIFAESA sei halo koordenasaun para servisu sira ne’e tau antensaun no konvida AIFAESA nian ema iha ne’ebá para haree sasán tama-sai ne’e. (jornalista: Maria Auxiliadora; editora: Rita Almeida)

Foto: Sasán ne'ebé apreende husi funsionáriu AIFAESA iha loja sira.
PARTILHAR

Author: verified_user

Publicação luso-timorense sem fins lucrativos

0 comentários: