sábado, 25 de fevereiro de 2017

Governu Xina Entrega Sistema CCTV Ba Instituisaun PNTL

PARTILHAR
Dili, (ANTIL) – Governu Xina liu hosi nia Embaixadór iha Timor-Leste (TL), Fu Yuangcong entrega sistema Closed Circuit Television (CCTV) 50 (Lima Nolu) ba Polisia Nasionál TL (PNTL) atu monitoriza movimentasaun púliku iha kapital Dili.

Tuir Komandante Kerak Polisia Nasionál Timor-Leste (PNTL), Julio da Costa Hornai apresia no orgullu tebes ba Governu Xina ho kooperasaun liuhosi Ministériu Interiór TL ne’ebé ajuda polisia atu kontrola no monitoriza  situasaun na’ok, asaltu, asidente tráfiku no arte marsiál sira.

“Kamera video no sistema televizaun hosi CCTV uza hodi prevene no evita krime iha espasu públiku atu garante seguransa no estabilidade nasaun nian” Komandu PNTL, Julio da Costa Hornai liuhosi intervensaun iha ámbitu serimónia entrega CCTV, Caicoli, Kinta (23/02).

Tuir Komandu PNTL, Closed Circuit Television (CCTV) halo gravasaun imazen no detekta kualker eventu no insidente ne’ebé mosu iha tempu reál, atu seguransa sira bele halo atuasaun.

Ho sistema CCTV sei ajuda PNTL atu prevene no investiga situasaun ne’ebé bele hamosu krime espesiál iha kapitál Dili.

“Ohin ita inagura CCTV ba ámbitu seguransa nian atu bele apoiu hodi kombate terorizmu, kriminalidade, jeralmente monitorizasaun tráfiku ho asidente tráfiku ba situasaun liga ho arte marsiál hodi garante seguransa ba estabilidade nasaun nian”.

Kontribuisaun hotu-hotu nian sei harii nasaun ne’ebé seguru, demokrátiku ho sidadaun sira bele sirkula livre no laiha tauk.

Hein katak proximu kontribuisaun no apoia alarga liu tan to’o iha munisípiu, fronteira, vijilansia maritime atu PNTL bele kontrolu situasaun iha rai laran.

Iha serimónia ne’e hetan partisipasaun hosi Ministru Interiór, Longuinhos Monteiro, Embaixadór Xina iha TL, Fu Yuangcong, Komandante-Geral PNTL, Julio da Costa Hornai, Ministru Defeza, Cirilio Cristovão, Koronel Falur Rate Laek, Prezidente Komisaun B ne’ebé trata asuntu Seguransa, David Dias Ximenes inklui membru Polisia Nasionál Timor-Leste (PNTL).(Jornalista : Zezito Silva/Editor : Alberto Alves)

Foto: Kamera CCTV hamutuk 50 ne’ebé lansa ona iha Kapitál Dili, hosi Tasi Tolu to’o Bekora atu monitoriza movimentasaun iha espasu públiku, hafoin halo serimónia entrega hosi Embaixadór Xina ba PNTL iha Caicoli, Kinta, (23/02). Foto/Zezito Silva
PARTILHAR

Author: verified_user

Publicação luso-timorense sem fins lucrativos

0 comentários: