sábado, 25 de fevereiro de 2017

KI: JORNALISTA SIRA VIOLA KODIGU ETIKA

PARTILHAR
DILI: Papel jornalista nudar ponte informasaun ezije profesionalizmu, independensia no imparsialidade iha serbisu jornalizmu nian. Ida ne’e hatur ona iha kodigu etika jornalista, maibé Konsellu Imprensa identifika katak durante ne’e jornalista sira komete iha violasaun ba sira-nia kodigu etika rasik.

Ba kestaun ida ne’e, KI realiza enkontru ida ho Xefe Redasaun husi instituisaun media nasionál sira hodi informa problema ne’e no husu atu hadi’a idaidak ninia redasaun.

Preziente KI, Virgilio Guterres husu ba parte redasaun atu tenke toma-atensaun ba notisia ne’ebé mak públika.

Durante ne’e, nia dehan, KI identifika katak notisia balun ne’ebé públika kontra kodigu etika jornalizmu.

Virgilio rekomenda atu fó formasaun no treinamentu ba jornalista sira nune’e bele hakerek ho di’ak.

“Presiza iha formasaun no treinamentu kona ba gender sensitive, presiza iha formasaun no treinamentu kona-ba abilidade no koñesimentu jornalistiku, halo sosializasaun kona-ba kodigu etika jornalistika,” dehan Virgilio iha sala enkontru Sekretariadu Tekniku Administrasaun Eleitoral (STAE), Kaikoli-Dili, Sesta (24/02).

Iha fatin hanesan, Konsileiru KI, José Maria Ximenes rekomenda ba instituisaun media sira atu evita hatama opiniaun pesoal jornalista iha notisia ne’ebé hakerek no públika.

“Ami haree iha jornál balun jornalista hakerek nia opiniaun mak barak,” dehan nia.

Entretantu, Xefe Redasaun Jornál Semanal Matadalan, Cansio Ximenes konsidera enkontru ne’e importante tebes ba instituisaun media, liliu ba jornalista sira atu bele hakerek ho di’ak.

“Ha’u apresia tebes ba enkontru ida ne’e tanba fó passu positivu ba ita, media sira, no tulun teb-tebes atu dezenvolve an hodi nune’e ba futuru bele hadia kualidade notisia no kualidade jornalista di’ak liu tan,” dehan Cansio. (*)

Ola Timor – Estaziariu - Editór: Tellukoro

Foto: Konsellu Imprensa realiza enkontru ho Xefe Redasaun sira husi Intituisaun Media Nasional hodi koalia kona-ba violasaun ba kodigu etika ne'ebe jornalista sira komete, iha sala enkontru STAE, Kaikoli-Dili, Sesta (24/02). FOTO: olatimornews
PARTILHAR

Author: verified_user

Publicação luso-timorense sem fins lucrativos

0 comentários: