domingo, 26 de fevereiro de 2017

MI Longuinhos: Kamera CCTV Bele Reprezenta Matan Polisia

PARTILHAR
Dili, (ANTIL) – Kamera Closed Circuit Television (CCTV) ne’ebé lansa ona iha Kapitál Dili bele reprezenta matan Polisia Nasionál Timor-Leste (PNTL) wainhira seguransa la marka prezensa iha momentu akontesimentu.

Lia hirak ne’e hato’o hosi Ministru Interiór, Longuinhos Monteiro iha nia intervensaun ba serimónia entrega  CCTV hosi embaixadór Xina, Fu, Yuangcong hamtuk 50 ba PNTL iha Caicoli, Kinta (23/02)

“Uluk ita servisu troka malu ho oras maibé dadaun ne’e kamera komesa barak atu iha vizibilidade atividade servisu nune’e bele monitoriza espasu públiku di’ak liu tan ho sirkunstasia trankuilidade ordem públiku nian” MI Longuinhos haktuir.

Objetivu lansa Kamera CCTV iha kapitál Dili atu fasilita polisia hodi determina asaun iha terenu no monitoriza koredoór balun ne’ebéé la konsege hetan asesu.

Asidente tráfiku barak iha tempu kalan maibé laiha prezensa elementu PNTL, entaun hosi Kamera CCTV bele ajuda hodi kapta imazen no grava hodi justifika hafoin halo intervensaun.

Ministro explika katak kooperasaun ne’ebé mak governu rua ne’e halo tanba interese seguransa públiku atu ba futuru sei iha posibilidade sei alarga tan instalasaun kamara CCTV 10 ba kada kapitál munisípiu atu fasilita di’ak liu tan monitorizasaun ba movimentasaun públiku.

Entretantu, sistema tribunál dala ruma akontese sira la aseita imazen sira ne’e atu servi hanesan evidénsia, maibé la taka dalan ho CCTV ajuda liu polisia atu orienta atividade polisia iha terenu no bele mós ho inisiativa polisia nian propoin ba tribunál.

Além ba ne’e. ministériu sei haree molok fulan Agosto kareta polisia ne’ebé halo patrullamentu tenke ho kamera vidru iha oin wainhira halo operasaun iha terenu. (Jornalista: Zezito Silva/Editor: Alberto Alves )

Foto: Iha serimónia ne’e hetan partisipasaun hosi Ministru Interiór, Longuinhos Monteiro, Embaixadór Xina iha TL, Fu, Yuangcong, Komandu PNTL, Julio da Costa Hornai, Ministru Defeza, Cirilio Cristovão, Koronel, Falur Rate Laek, Prezidente Komisaun B ne’ebé trata asuntu Seguransa, David Dias Ximenes inklui membru Polisia Nasionál Timor-Leste (PNTL). Foto ANTIL/ Zezito Silva
PARTILHAR

Author: verified_user

Publicação luso-timorense sem fins lucrativos

0 comentários: