PM Rui: Prepara Aan Didi’ak atu sai Kombatente ba Libertação do Povo

SAME, (ANTIL) - Primeiru-Ministru (PM), Rui Maria de Araújo hateten katak agora ita iha oportunidade atu prepara aan  didi’ak hodi sai kombatente ba libertação do povo tan libertação da pátria, kombatente sira hatudu ona dalan mai ita.

“Prepara aan didi’ak atu sai kombatente ba libertação do povo. Kombatente ba libertação da pátria, sira hatudu ona dalan. Sira la liuhusi universidade, sira la liuhusi institutu maibé sira dedika sira-nia aan tomak hodi liberta pátria,” PM Rui husu ba estudante sira tomak iha Timor-Leste bainhira halo intervensaun, iha programa lansamentu Instituto Politécnico de Betano (IPB), Same, Maunfahe, Kinta (23/2).

Nia reforsa, agora ita-nia vez, liliu joven sira hahú kedas husi ensinu báziku sa’e to’o ensinu superiór, ita hotu nia responsabilidade atu prepara aan didi’ak hodi nune’e iha 2030, tuir périodu ne’ebé Planu Estratéjiku Dezenvolvimentu Nasionál (PEDN) defende tiha ona, estudante sira mós bele reklama títulu kombatente libertação do povo.

“Atu serbisu ba libertação do povo la’ós fásil. Tenke estuda maka’as, tenke kadi maka’as tebes imi-nia kuriozidade atu aprende,”  hateten tan xefe sestu governu konstitusionál ne’e ba estudante sira tomak.

Nia mós afirma katak la’ós estuda maka’as no iha de’it kuriozidade atu aprende maibé mós buka atu aplika buat ne’ebé estudante sira aprende tuir kursu ne’ebé iha.

“Kursu ne’ebé imi tuir sei prepara imi atu dada imi-nia kamiza nia liman, hikis kosar serbisu atu produz animál hanesan ayam potong ne’ebé ita sei importa, produz manutolun ne’ebé ita sei importa, produz na’an karau, na’an bibi ne’ebé ita-nia supermerkadu iha Díli sei nafatin importa,” PM salienta.

Primeiru-Ministru, Rui Maria de Araújo reforsa, ida ne’e mak preparasaun estudante nian katak prepara aan atu serbisu, prepara aan atu hikis kosar.

Hanesan konstrusan sívil, estudante nia preparasaun la’ós atu sai enjeñeiru atu hothotu serbisu iha serbisu iha eskritóriu maibé atu sai pedreiru, karpinteiru no fiskalizadór obras hodi nune’e estrada sira bele fiskaliza didi’ak hodi udan labele lori arbiru bainhira udan tau rai.

“Bainhira imi dedika aan ba ida ne’e, molok imi hakfodak, sei hetan duni libertação do povo,” hateten tan PM.

Xefe sestu governu konstitusionál ne’e apelu mós ba estudante sira iha IPB no Timor-Leste tomak katak prosesu dezenvolvimentu Timor-Leste hodi liberta ita-nia povu sei naruk. Estudante iha oportunidade atu prepara aan didi’ak atu sai eroi foun, nune’e tinan 20, tinan 30 oin mai, bele sai eroi foun atu dudu prosesu dezenvolvimentu iha ita-nia rain.

Tanba ida ne’e, estuda agora, labele hanoin de’it atu tama universidade para atu hetan gelar, hetan doutór, hetan enjeñeiru. Lae. Tenke aprende kompeténsia téknika ne’ebé  importante  atu utiliza iha dezenvolvimentu ita-nia rain. “Ida ne’e apelu ida la’os ba estudante sira iha Betano, Manufahi maibé apelu ida ba estudante sira tomak iha Timor laran tomak,” PM apela.

Atu konklui, PM Rui reforsa, dalan ne’ebé loos atu eskolla estudante ninia partisipasaun ba dezenvolvimentu Timor-Leste aban bain rua nian la’os ho títulu akadémiku maibé ho kompeténsia téknika hodi nune’e kontribui iha prátika, iha realidade ba dezenvolvimentu ita-nia rain.

Iha Fatin hanesan, Prezidente Parlamentu Nasionál, Aderito Hugo hateten, nia parte kongratula parte no pasu lubuk ida ne’ebé Ministériu Edukasaun (ME) halo hodi rejista tan istória ida, harii Instituto Polítécnico Betano (IPB).

“Progresu ida ne’e reforsa tan progresu lubuk ida dezde primeiru governu, to’o kintu governu no ohin loron sestu governu,” prezidente parlamentu ne’e akresenta.

Nia hatutan, hanesan polítiku, hanesan reprezentante povu envolve iha desizaun lubuk ida espesialmente iha lejislasaun sira relativa ho istória edukasaun ninian, ligada ho lejislasaun lei ensinu báziku ne’ebé vigora iha 2008, 2009 no estatutu dosente ninian no primeiru hetan obstakúlu hodi define no projeta setór edukasaun ho kuidadu no responsabilidade.

“Ha’u kontente tebes tanba UNTL loke ninia liras dadauk ona. Hasoru obstakúlu lubuk ida maibé ha’u fiar katak se ita hotu hamriik iha koridór ida de’it atu envolve setór edukasaun ho responsabilidade ho kuidadu obstákulu sira sei enfrente ho di’ak no susesu,” nia konklui.

Lansamentu Instituto Polítécnico Betano (IPB) hetan partisipasaun másimu husi komunidade, membru governu no parlamentu, akadémikas, konfisaun relijioza, autoridade seguransa, lokál nomós seluk tan. (Jornalista:Rafy Belo/Editor: Alberto Alves)

Foto: Primeiru-Ministru (PM), Rui Maria de Araújo durante diskursu perante estudante, komunidade, autoridade lokál, konfisaun relijioza no seluk iha serimónia lansamentu Instituto Politécnico de Betano (IPB), Same, Maunfahe, Kinta (23/2). Foto: GPM