quarta-feira, 29 de março de 2017

AFP: Prezidente Indonézia nian nakloke ba adiamentu kona-ba kastigu mate nian

PARTILHAR
Prezidente Indonézia nian, Joko Widodo, hatete iha entrevista ba AFP katak nia nakloke ba adiamentu ida kona-ba kastigu mate nian bainhira populasaun hakarak, maibé la fó sai nia intensaun sira.

Entrevista hosi AFP halo ona antes vizita hosi Prezidente fransés, François Hollande, ba nasaun aziátiku.

Kondenadu na'in 18 ba kastigu mate tanba tráfiku droga nian, barak liu hanesan sidadaun estranjeiru, mate ona iha Indonézia dezde Joko Widodo to'o iha poder, iha tinan 2014 nia rohan, no ema sanulu resin maka hein hela hodi simu kastigu ne'e.

Bainhira AFP husu iha loron-segunda ne'e kona-ba posibilidade atu hahú fali adiamentu ne'ebé adopta hosi Prezidente anterior, Widodo hatudu favorável ba hanoin ne'e - iha jeral hanesan hakat ida hodi halakon kastigu ne'e -, ho kondisaun katak iha apoiu hosi populasaun.

"Tansá maka la'e? Maibé tenki rona populasaun. Bainhira sira hatete sim, ha'u sei hahú prepara [hakat importante sira], maibé bainhira ha'u nia povu lakohi, ne'e sei hanesan susar mai ha'u", Joko Widodo hatete no la fó sai nia intensaun sira.

Widodo haktuir sondajen ida ne'ebé halo iha 2015 ne'ebé hatudu 85% hosi ema sira hatudu favorável ba kastigu mate ne'e ba ema sira ne'ebé hetan kondenasaun tanba tráfiku droga nian, hodi subliña katak presiza aprovasaun hosi Parlamentu ba abolisaun ida.

Deklarasaun sira ne'e mosu iha tempu ida ne'ebé organizasaun internasional sira no organizasaun indonéziu sira aprezenta ona relatóriu ida ba Konsellu Direitu Ema nian iha ONU, hodi kesar kona-ba insisténsia hosi Jakarta hodi halo kastigu mate ne'e iha nasaun ne'ebé nia sistema judisiáriu hanesan koruptu no ne'ebé maka ema kondenadu sira hetan bandu hosi sira nia direitu oioin hanesan asesu ba asisténsia judisiáriu ka intérprete ida, haktuir hosi Jakarta Post.

Iha 2015, Indonézia ezekuta ona ema na'in 14, inklui ema brazileiru na'in rua, ema holandés na'in ida no australianu na'in rua.

Iha fulan-Jullu 2016, autoridade indonéziu sira ezekuta ona ema na'in haat ne'ebé hetan kondenasaun tanba tráfiku droga, ema indonéziu na'in ida no ema nijerianu na'in tolu, maski iha opozisaun hosi organizasaun internasional sira no hosi ativista sira, fó sai hosi imprensa lokal.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: