Hadia Ensinu Pre-Eskolar Depende Kapasidade Orsamentu

DILI – Ministeriu Edukasaun (ME), konsidera bainhira atu hadia kondisaun ensinu pre-eskolar iha teritoriu Timor Leste (TL), depende ba kapasidade orsamentu neebe mak ME iha.

Kestaun nee fo sai husi Direitor Jeral ME, Antoninho Pires hatete, kestaun ida nee, ME identifika ona iha terenu, maibe atu hadia depende ba kapasidade orsamentu, tanba pre-eskolar nee maioria iha kapital Dili, no iha Munisipiu ida rua deit, maibe ba oin ME sei kontinua haree preokupasaun nee, para estudante sira iha pre-eskolar sira bele halao sira nia prosesu aprenndizajen ho diak liu tan.

Prontu asuntu ida nee ami identifikadu tiha ona katak, depende kapasidade orsamentu neebe mak ami iha, hau hanoin konaba numeru pre-eskolar nee ami ladun rekor diak, maibe maioria pre eskolar nee barak liu iha Kapital Dili,” dehan DJ Antoninho ba jornalista iha sala konfrensia ME Vila-Verde, Dili, Kinta (30/03/2017).

Antoninho akresenta, ME mos hahu hadia ona pre eskolar, para estudante sira bele halao prosesu aprendizajen iha eskola, tanba nee, pre eskolar balun hadia dadaun, bainhira atu responde hotu, depende ba iha orsamentu.

Nunee mos Direitor Jeral pre-eskolar, ensinu baziku no ensinu rekorrente, Cidalio Leite rekonese los duni kondisaun pre-eskolar balun too agora seidauk priense kriteriu, tanba haree ba kondisaun pre eskolar iha kapital Dili, balun kondisaun seidauk diak, intermus de sala prosesu aprendizajen seidauk sufsiente ba estudante sira. Jacinta Sequeira/Guilhermina Franco

Suara Timor Lorosae