quarta-feira, 29 de março de 2017

PNTL HALO BUAT BARAK IHA TINAN 17, ESTADU ATRIBUI MEDALHA BA PNTL

PARTILHAR
Komandante Jeral Polisia Nasional Timor Leste (PNTL), Komisario, Julio Hornai hateten, durante tinan 17 ne’e PNTL halo ona buat barak, maibe rekoñese seidauk masimu.

“Iha tinan 17 nia laran buat barak mak PNTL hala’o ona hodi asegura estabilidade paz no seguransa ba rai ida ne’e, maibe buat balun la’o ladiak mós husi individu Polisia halo hodi preve instituisaun ida ne’e, apezar desizaun disiplinar husi Komando foti ba iha nia membrus tantu demisaun, suspensaun, ”Komandante jeral PNTL, Komisario, Julio Hornai, hato’o iha ninia diskursu selebrasaun aniversario PNTL ba dala 17, Segunda (27/03/2017) iha Akademia Polisia Comoro-Dili.

Julio Hornai hatutan, durante ne’e PNTL hetan kritika barak husi sosiedade sivil, parlamentu no seluk tan ba servisu PNTL, maibe instituisaun sempre esforsu hodi mantein nafatin paz no estabilidade ba povu no rai Timor.

Planu estratejiku dezenvolvimentu tinan 2014-2020 PNTL nian mak atu hasaé kapasitasaun ba membrus PNTL ba formasaun, area administrasaun, lejislasaun, disiplina no operasaun.

Nune’e mos, iha tinan 2016  PNTL rejistu kazu asidente 1,74, husi numeru refere ema hamutuk 71 mak mate, kanek todan 91, kanek kaman 1.553, infrasoins 11.398  total 4206.

Iha selbebrasaun aniversario PNTLl ba dala 17 ne’e eis Komandante Operasaun PNTL, Superentendente Chefi, Mateus Fernandes, mak sai hanesan Komandante parade militar, hodi komanda PNTL sira husi Unidade Policia Fronteira, Unidade Polisia Espesial,  Unidade Polisia Maritima, Polisia Migrasaun, Polisia Anti Teror.

Seremonia ne’ebe refere partisipa husi Prezidente Reúblika (PR), Taur Matan Ruak, ho ninia espoza Isabel Ferreira, Primeiru Ministru  Rui Maria de Araújo, Ministru  Interior, Longuinhos Monteiro, Ministru Defesa, Cirilio Cristovão, no  ajensia internasional sira  iha Timor-Leste, no mos membrus PNTL sira.

Estadu atribui medalha ba PNTL

Iha aniversario PNTL ba dala 17 ne’e Estadu Timor Leste, liu husi Prezidente  Repúblika, Taur Matan Ruak, atribui medalha ordem de Timor ida ba instituisaun Polisia Nasional Timor Leste no atribui ida Komandante Jeral PNTL, komisario, Julio Hornai.

Iha evenetu refere entrega mos medalha orru prata ba Komandante ho devisa Superentendente Chefi  hamutuk nain lima (5), medalha grau prata ba Komandante ho devisa superentendente hamutuk nain 13 husi Munisipiu13.

Medalha grau prata ba membru PNTL sira ho devisa Ajenti Chefi no Inspektur Chefi hamutuk nain 10, nune’e mos medalha komportamentu exemplar ba membru PNTL nain ida, no F-FDTL ida. Entretantu Vice Ministru Estatal, Tomas Cabral  hetan mós  medalha meritu segurasa nian.

 Iha serimonia ne’e hala’o mós promosaun devisa ba membru PNTL antiguidades hamutuk nain 9 ne’ebé mak ho devisa atual ajenti sae ba ajenti prinsipal sae ba ajenti Chefi.

Hafoin atribuisaun ne’e Ministru Interior, Longuinhos Monteiro hateten,  komando Jeral atribui medalha kondekorasaun ho grau oi-oin ba iha ofisiais sira ne’ebé serbisu kaer komando durante tinan lima, ba mos ofisiais sira ne’ebé prestasaun serbisu diak, sira ne’ebe antiguidade durante tinan 15 ejerse funsaun sein prosesu ruma, no nain 10 resin durante operasaun tinan 2014-2015 hetan kanek.

“Serbisu sira ne’e hotu Estado no instituisaun rekoñese esforsu ne’ebe sira halo. Instituisaun hatene rekoñese ema hatene mos kastigo ema, ida ne’e mak balansu ida diak tebes,”haktuir Longuinhos Monteiro.

Iha fatin hanesan Vise Ministru Administraçao Estatal (MAE), Tomás do Rasário Cabral hateten, medalha kondekorasaun ne’ebe mak Estado fo ne’e bazea ba servisu ne’ebe mak durante ne’e nia hala’o.

“Kondekorasaun altu nivel ida sira fó ba ami hanesan orden de seguransa públiku ne’ebé iha ligasaun mós ami nia servisu,”hatete Tomás Cabral.

Iha okaziaun ne’e, Primeiru Ministru Rui Maria Araújo mós hateten katak, atribuisaun medalla ba Komandu Jeral PNTL, ofisiais to’o ajente sira ne’e bazeia ba kuadru legál ne’ebé durante ne’e iha tiha ona.

“Instituisaun PNTL rasik iha mekanismu oinsa atribui kondekorasaun lovoris ba ajente, sarjentu, ofisiais sira, kuadru legal ba ida ne’e iha tiha ona, instituisaun halo tuir deit. Ohin ne’e simboliku, sira iha kondekorasoens no promosaun iha instituisaun PNTL nia laran, tradisaun durante ne’e maka kuandu selebra aniversariu sira sempre kondekora halo promosaun ba polisia sira”, hateten Rui Araújo.

Nune’e mós Rui Araújo dehan, durante ne’e F-FDTL ho PNTL sai parte husi prioridade Governu nian, liu-liu iha área seguransa no defeza.

“Tinan-tinan Governu sempre aloka orsamentu ba instituisaun sira ne’e, klaru ke, ho kresimentu instituisaun ninian, konfleksidade tarefas ne’ebé instituisaun ne’e iha, tinan-tinan ita presiza reve fila fali apoiu sira ne’e hodi nune’e kria kondisoens ne’ebé di’ak hodi sira serbisu di’ak liu tan”, Xefi Governu ne’e esplika.Ekipa JN-Diário.
Be Sociable, Share!

Jornal Nacional Diário
PARTILHAR

Author: verified_user

Publicação luso-timorense sem fins lucrativos

0 comentários: