Veteranus enkontru ho PR eleitu, Lu-Olo: “Ha’u mak lakon, naran veteranus mós hotu ona”

Prezidenti Repúblika eleitu ba periodu 2017-2022, Francisco Guterres ‘Lu-Olo’, segunda (27/03), enkontru ho reprezentante veteranu sira husi Munisípiu hotu hodi fó agradesimentu ba veteranu sira nian apoiu ne’ebé fó ba nia iha eleisaun Prezidensial.

Francisco Guterres ‘Lu-Olo’ eleitu ho votus 57,08% iha eleisaun Prezidensial 20 Marsu, nu’udar kandidatu ne’ebé mak hetan votus persentajen boot liu husi husi Kandidatu na’in walu hitu seluk, hanesan António da Conceição ‘Kalohan’ 32,47%, no kandidatu na’in nen seluk hetan porsentajen ne’ebé ki’ik liu.

Iha nia intervensaun, Lu-Olo hateten katak, eleisaun Prezidensial ne’ebé liu husi mós veteranu sira nian esforsu hamutuk ho FRETILIN, CNRT no mós partidu polítika sira seluk, konsege duni lori nia ba Palasiu Prezidensial Aitarak Laran.

“Antes eleisaun ha’u hatete ona ba alin veteranu sira katak, se Lu-Olo lakon, veteranu sira hotu lakon no ita tomak lakon, la’os FRETILIN nia kandidatu de’it mak lakon,  maibé ita veteranus mak lakon. Se Lu-Olo lakon, veteranus mós hotu iha ne’e, dalaruma ema sei la tau imi iha fatin ida ne’ebé mak ami fó dadauk. Ida ne’e buat hotu ha’u hatene, ha’u senti, ha’u rona mak ha’u ko’alia ne’e,”relata Lu-Olo ba veteranu sira iha Comite Central da FRETILIN (CCF) Comoro Dili.

Prezidenti Repúblika sei lori nafatin iha nia liman, atu oinsa bele tau imi iha fatin ida, fatin ida ne’ebé veteranu nian, no fatin ida ne’ebé aas, atu nune’e, povu tomak bele hatene rekuñese veteranu sira, liu husi veteranu sira nia obra, hahalok no servisu ne’ebé mak presta tiha ona ba rai ida ne’e.

“Hanesan Prezidenti Repúblika eleitu, sei lahaluha mós nia alin veteranu sira, iha kampaña mós ha’u ko’alia, ha’u la promete buat di’ak ida, maibé buat ne’ebé mak tara iha imi nia kabas leten, ou imi nia hirus matan ka imi doku iha imi nia ulun, ha’u hakruk ho respeitu bo’ot tebes, tanba lei mak haruka, lei mak rekuñese no lei mak tau,” tenkik Lu-Olo.

Nia haktuir, buat ne’ebé mak hanesan veteranu nian, so veteranu sira mak hatene malu. Ema seluk bele rekuñese duni veteranu sira, maibe dalaruma bele kuñese sala.

“Tanba ne’e mak ita iha Prezidenti Repúblika ida ne’ebé mak imi hamutuk hili tiha ona, ha’u sei lori nafatin veteranu iha ha’u nia liman, atu bele hatur imi iha nia fatin. Ha’u sei ko’alia ho futuru Governu mai, atu oinsa definisaun polítika kona ba veteranu sira  nian, atu bele hetan fatin dignu, atu bele veteranu sira halo nafatin buat ruma ba ita-nia rai,” salienta Lu-Olo.

Tanba ne’e, Lu-Olo dehan, Prezidenti Repúblika sei buka nafatin hodi hahi veteranu sira, hodi marka diferensa ida ho sidadaun sira seluk katak, veteranu sira luta na’in no terus na’in.

Lu-Olo hatutan, veteranus tenki harii nia uma ketak ida, hodi povu bele respeita sira hanesan ema funu na’in. maibé Lu-Olo dehan, dekreitu lei veteranus nian, la passa  tanba Prezidenti Repúblika veta tiha ona lei ne’e, hodi haruka fila fali ba Governu.

“Ida ne’e signifika se susar oit uan para ita harii ita nia uma kain ida ketak, ne’ebé bolu naran, Konsellu Nasionál Kombatentes, no Veteranus Libertasaun Nasionál. Ida ne’e kuandu hamrik ona, naturalmente nia sai hanesan ibun, tilun, matan ba veteranu sira nian, atu hato’o problema no preokupasaun ne’ebé mak veteranu sira senti,” katak Lu-Olo.

Maibé Xefi Estadu eleitu ne’e dehan, maske dekreitu lei ne’e la pasa, maibé tempu se iha para atu haree fila fali lei ne’e.

Nia haktuir, liafuan ne’ebé antes atu hakat ba eleisaun Prezidensial, veteranu sira rasik hato’o ona sira nia liafuan ba nia (Lu-Olo) katak, veteranu sira sei la’o hamutuk nafatin ho nia to’o eleisaun.

“Signifika katak, vitória ida ne’e, la’os de’it ha’u nian, vitória mós ba veteranu sira, no vitória mós ba povu tomak nian. Tanba ne’e mak ha’u dehan, buat ne’ebé mak veteranu sira mai husik hela iha fatin ida ne’e, hori uluk kedas hateten, hori uluk kedas hatutan de’it ita nia kompromisu bo’ot tebes ne’ebé uluk ita hamutuk iha ailaran, no balu iha FRENTI Klandestina, ita husik hela hamutuk ita nia kompromisu ida ne’e katak, liberta ita-nia rai atu tuir fali mai ita liberta ita nia povu,” dehan Lu-Olo.

Prezidenti Repúblika eleitu ne’e haktuir, prosesu rua ne’e mak lori veteranu sira kompriende di’ak liu tan sira-nia aan hanesan veteranus no luta na’in, atu hatudu tan dala ida ba ema hotu katak, maske veteranu sira lahatene buat barak, maibé funu hatene halo no hatene manan.

Lu-Olo afirma, dala ida ne’e tan, iha eleisaun Prezidensial, veteranu sira hatudu nafatin ba ema katak, maske sira lahatene halo buat barak, maibé veteranu sira iha prosesu nia leten nafatin.

“Ha’u husu de’it ba alin veteranu sira hotu katak, ita hotu tenki hamutuk nafatin hodi hateke ba oin. Tanba ne’e ha’u husu de’it ba alin sira nune’e, kontinua atentu nafatin atu hakat ba oin, agora imi tiding tiha ona fatuk inan ne’e  iha dalan no ita manan ona, maibé imi tuba metin nafatin iha fatuk inan ne’e hotu para ita kontinu luta nafatin ba iha eleisaun ida tuir mai, atu nune’e, ha’u nia liman los imi tau ona, falta de’it liman karuk ne’e mak imi tenki tau,” relata Lu-Olo.

Nia haktuir, ida ne’e atu bele lori konkretiza mehi ne’ebé mak uluk veteranus hotu mehi iha ai laran katak, tenki liberta povu husi ki’ak no mukit. Misaun ida ne’e difisil no todan, maibé Lu-Olo fiar katak,   bainhira veteranu sira sei rona malu no hamutuk nafatin, maske sira lahalo buat hotu, maibé pelemenus hetan ona dalan atu halo buat ida ba objetivu ne’ebé mak hakarak atu alkansa.cos

Jornal Nacional Diário