AJENTE ZEESM AMEASA POVU, HAKARAK DEZENVOLVIMENTU TENKI TUIR PARTIDU

Xefi bankada CNRT, Natalino dos Santos, hateten, nia lamenta tebes tanba ajente balu husi Autoridade Zona Espesial Ekonómia Sosial Merkadu (ZEESM) Oe-cusse, kontinua halo ameasa ba povu Oe-cusse katak, hakarak dezenvolvimentu elektrisidade no estrada tama lalais, tenki tama partidu.

“Ha’u la’o to’o Aldeia ida iha Suku Naimeco, Aldeia Baqui, Aldeia ida naran  Bubune. Aldeia ne’e ita atu ba, ita la’o ain liu de’it husi mota kuaze km 2 resin. Iha Aldeia ne’e iha familia 40 mak hela iha ne’eba, sira nia estrada no elektrisidade mós laiha. Iha informasaun husi povu iha Aldeia ne’e katak, foin dada’uk iha ajente balu ba iha ne’eba hodi hatete ba povu katak, se karik imi hakarak elektrisidade tama, tenki tama partidu ida hanesan ne’e,” informa Natalino dos Santos ba plenária PN, Segunda (24/04).

Maibé Natalino dehan, nia lakohi temi sai partidu ne’e nia naran, tanba asuntu ne’e nia levanta bebeik ona iha plenária.

Natalino hatutan, kondisaun estrada no ponte sira iha Rejiaun Administrativa Espesial Oe-cusse, liu-liu iha Postu Administrativa sira ne’e grave tebes.

Nia mos salienta, estrada atu ba Postu Administrativu Pasabe, mota ida naran Noel Ekat iha tempu udan araska tebes ba komunidade sira atu halo movimentu.

“Fatin ida Pasabe ho Nitibe ne’e, fatin potensia tebes ba aifuan, modo no buat hotu. Tanba ne’e povu husu Governu sentral atu bolu atensaun ba autoridade ZEESM, atu tau kondisoens ba estrada sira ba Postu Administrativu sira iha Oe-cusse,” katak Natalino.

Nia mós husu katak, orsamentu ne’ebé aloka ba rejiaun Oe-cusse ne’e, autoridade tenki iha planu para Postu Administrativu Rejional hat ne’e, tenki iha orsamentu ida ne’ebé ekilibriu, atu dezenvolvimentu bele la’o iha Oe-cusse tomak labele tau de’it iha Pante Macassar.

Nia hatutan, polítika ida ne’e lalos, tanba povu povu presiza atu hetan elektrisidade hanesan mós povu iha Aldeia sira seluk.

“Ha’u hakarak bolu atensaun ba Autoridade Rejiaun katak, karik implementasaun, husu atu hatete ba ajente sira ne’e, labele uza lia fuan sira hanesan ne’e, tanba povu iha direitu atu asesu ba elektrisidade ho estrada,” dehan Natalino.

Alende ne’e, Natalino mós lamenta katak, iha merkadu bo’ot ida iha Oe-cusse, naran merkadu Maumate, kondisaun aat tebes, tanba iha tempu udan, komunidade sira faan sasan iha tahu laran de’it.

Iha fatin hanesan, deputadu Manuel de Castro husi bankada FRETILIN, hateten katak, karik iha ZEESM ne’e ema balu mak halo duni hanesan ne’e, PN tenki bolu sira hodi esplika iha PN.

“Parlamentu Nasionál, liu-liu Xefi bankada sira bele tuur hamutuk ba, tanba isu ida ne’e horibainhira foti tiha ona, ami ba haree tiha ona, mas agora foti fila fali, sei bele bolu sira mai iha ne’e, para depois ita bele haree tok situasaun ne’e la’o oinsa,”dehan Manuel de Castro.cos

Jornal Nacional Diário