EUA-KN FUNU, TL SEI EVAKUA NIA TRABALLADOR HUSI KS

Sekretariu Estadu Politika Formasaun Profisional no Empregu (SEPFOPE), Ilidio da Costa Ximenes, informa, Korea do Norte (KN) ho Estados Unidos da America (EUA) funu ona,  Estadu Timor-Leste sei evakua timor oan nebe servisu Korea do Sul.

 “Situasaun iha rai ne’eba diak hela, mas kuandu akontese buat ruma Governu Koreano sira sei hato’o mai Governu Timor-Leste hodi evakua ita nia ema sira husi ne’eba,”hatete Ilidio da Costa Ximenes ba jornalista sira iha  Delta Nova, Comoro-Dili, Kinta (27/4/2017), relasiona tensaun politika iha Korea ho EUA.

Maske nune’e, tuir Ilidio da Costa Ximenes, katak, oras ne’e dadauk, EUA ho KN foin lansa ameasa ba malu, seidauk funu nuklear ne’ebé sira iha.

Ilidio afirma, situasaun refere hanesan ameasa deit, tanba ne’e familia no inan aman husi traballador sira ne’ebé iha Korea do Sul lalikan tauk.

Nia dehan, nu’udar Governu bainhira iha ona sinal ladiak ruma husi situasaun refere maka Governu Koreanu kontaktu TL, Governu TL sei foti desizaun  hanesan halo karta ruma nune’e bele evakua  sidadaun Timor oan iha KS.

“Foin ameasa malu deit, informasaun husi ita nia embaixadora Adalgiza katak   ameasa ne’e sei ameasa por ameasa, maibe Governu Koreanu seidauk haruka para ema evakua nia ema sira. Ita nian Ministru Negosiu Estranjeirus no Kooperasaun (MNEK ) rasik deklara katak to’o agora ameasa sira ne’e seidauk iha perturbasaun ne’ebé seriu,”hatete Ilidio.

Nia hatete, traballador Timor oan sira dadauk ne’e hala’o sira nia servisu hanesan bai-bain maske loron bo’ot sira kontinua servisu  tanba seidauk iha ameasa  ruma ne’ebé mak seriu ba sira nia vida.

Parte seluk Sekretariu ezekutivu Konfederasaun Sindikatu Timor Leste (KSTL), José da Conceição hatete, tensaun politika entre rai rua ne’e oras ne’e dadauk la’os ona konsidera hanesan baibain, maibe maka’as ona kompara ho tinan ida liu ba  ne’ebé sira koalia deit, maibe dadauk ne’e uza ona ekipamentus  material funu nian.

“Ida ne’e hatudu dehan tensaun ne’e sa’e kompara ho tinan  rua ba kotuk ne’ebé mosu katak iha hanoin ida katak sei iha funu entre nasaun rua KN nomos KS  ne’ebé uza ekipamentus kimika ne’ebé bele estraga rai balun. Ne’ebé tensaun politika entre rai rua inklui America ne’e fo ona impaktu  ba mundu inklui Timor oan ne’ebé  dadauk mil ital mak servisu iha Korea do Sul,”preokupa José da Conceição.

Nia dehan, tensaun politika rai rua no hetan apoia husi EUA ne’e konsidera maka’as ona, tanba ne’e Governu tenki hahú hanoin ona  mesmu MNEK fo ona estatementu katak   situasaun refere laiha implikasaun ba Timor-Leste.

“Parte KSTL  nafatin koalia ho Governu  liu husi SEPFOPE kona ba oinsa  mak Governu iha responsabilidade liu-liu kona ba traballador sira iha Korea do Sul atu bele  nafatin koordena ho MNEK atu akompaña nafatin ita nia adidu sira iha ne’eba,”dehan nia.Ola

Jornal Nacional Diário