quarta-feira, 26 de abril de 2017

Komisaun Nasionál HIV/SIDA Planeia Matrís

PARTILHAR
DILI, (TATOLI) – Komisaun Nasionál Human Immunodeficiency Virus and Acquired Immunodeficiency Syndrome (HIV/SIDA) sei planeia halo fali matrís oinsá identifika ema moras, tratamentu no oinsá labele kontazia ba ema seluk.

Ministru Estadu no Koordenadór asuntu Sosiál, António da Conceição ba jornalista sira iha Komisaun Nasionál HIV/SIDA Praias dos Coceiros, kuarta, (26/4) ko’alia planu atu halo fali matrís.

“Tempu badak ita sei enkontru ho tékniku no pontu fokál hosi Komisaun Nasionál HIV/SIDA atu bele dezenvolve matadalan no oinsá instituisaun Estadu bele involve atu halo implementasaun”, dehan.

Enkuantu, komisaun aprezenta kona-ba inventarizasaun rekolla dadus, kampaña oinsá halo prevensaun moras HIV/SIDA no sira ne’ebé mate ona oinsá atu buka estratejia atu kontrola oan sira hanesan parte umanidade.

“Tenke fó hanoin nafatin ba públiku liuhosi kampaña sensibilizasaun atu labele iha tan infesaun moras HIV/SIDA, atu halo tratamentu no bele halakon moras HIV/SIDA”, hatutan.
Nia haktuir, númeru HIV/SIDA ne’ebé mak rejistu iha ministériu saúde hamutuk 641, feto 312 no mane 330, enkuantu mate 80.

“Tenke ida ne’e ona, labele iha tan moras, tinan oin mai númeru labele sa’e fali, ne’e hanesan kompromisu ne’ebé mak Primeiru Ministru, Rui Maria de Araújo hateten katak ida ne’e mak tenke halo duni”, haktuir.

Iha fatin hanesan, Xefe Governu hateten mai iha Komisaun Nasionál HIV/SIDA atu rona rezultadu servisu no oinsá mak atu dinamiza di’ak liu tan servisu.

Relatóriu ne’ebé ohin Sekretáriu Ezekutivu, Daniel Marcal hato’o fokus liu ba atividade kombate HIV/SIDA nian ba área importante tolu mak edukasaun, promosaun no saúde.

Hosi programa tolu ho objetivu atu sidadaun labele hetan moras HIV/SIDA, identifika hirak ne’ebé moras hafoin halo tratamentu no fó apoiu ba sira.

“Ida ne’e mak esforsu ne’ebé mak ita bele halo hamutuk no presiza fokus atividade, komisaun iha ona atu halo distribuisaun tarefa ba instituisaun hotu atu kontribui esforsu nasionál atu kombate HIV/SIDA”, tuir PM Rui. (Jornalista: Zezito Silva | Editora: Rita Almeida)
PARTILHAR

Author: verified_user

Publicação luso-timorense sem fins lucrativos

0 comentários: