sexta-feira, 28 de abril de 2017

Tenke Tane Aas Feto, Labele Uza ID Falsu Insulta

PARTILHAR
DILI - Ema hotu moris husi feto, tanba nee, tenke tane aas no tau valor ba inan feton sira, labele uza ID falsu insulta feto, hodi hatun feto sira nia diqnidade iha media sosial.

Lamentasaun nee hatoo husi xefi suku Caicoli, Hipolito Marques, hatete, ema hotu moris husi inan feton sira, tanba nee, labele hatun no insulta feto sira iha media sosial, liu-liu ema sira neebe mak gosta uza ID falsu, hodi bele hatun feto sira no sira uza lianfuan neebe mak la merese atu fo sai.

Hau sente ami hanesan autoridade local ninia haree konaba kestaun ida nee ladun diak, tanba nee, ami husu ba ita nia governu, para atu bele haree asuntu ida nee, liu-liu atu bele kontrola  iha media sosial, bainhira iha lei ruma fo dalan mai ami, ami bele haree kestaun ida nee, maibe  ida nee kompetensia ita nia governu para atu bele haree asuntu ida nee,” dehan Hipolito ba  STL bainhira partisipa iha enkontru ba preparasaun 20 de Maio iha edifisiu administrasaun Munisipiu Dili, Kinta (27/04/2017).

Hipolito hatete, ema hotu tenke respeita feto sira, no tau no tane aas feto nia diqnidade, tanba nee, labele uza fali media sosial hatun naran ida nee ka ida nee ba, bainhira uza media sosial, tenke uza ho responsabilidade, laos uza para hatun ema seluk.

Marques, saliente, bainhira ema uza media sosial nee laos buat ida neebe mak la diak lae, maibe husu konsiensia ema ida-idak nian para atu labele insulta malu, no uza tuir nia dalan, laos uza para atu hatun fali ema seluk nia diqnidade nee labele. Jacinta Sequeira/Guilhermina Franco

Suara Timor Lorosae
PARTILHAR

Author: verified_user

Publicação luso-timorense sem fins lucrativos

0 comentários: