Charles Schinner: Fundu soberanu Timor-Leste nian sei dura tinan 10 ho ritmu atual gastu nian

Investigador australianu Charles Schinner kalkula, iha loron-segunda ne'e, katak fundu soberanu Timor-Leste nian, harii hodi poupa no rentabiliza reseita petrolíferu sira nasaun nian, sei dura de'it tinan 10 oinmai, bainhira mantén ritmu atual hosi gastu sira governu nian.

"Dolar biliaun resin hasai tinan-tinan, liuliu hodi selu ba administrasaun no buat hotu ne'ebé maka governu halo. Hosi ne'ebá maka osan sai ba projetu boot sira infraestrutura nian [ne'ebé hala'o daudaun]", konsidera hosi investigador hosi organizasaun ne'ebé la'ós governu timoroan nian La'o Hamutuk.

Espesialista australianu ko'alia iha Asembleia Repúblika portugeza nian, iha Lisboa, iha debate ne'ebé hodi hanoin tinan 25 hosi Plataforma Internasional hosi Jurista sira ba Timor-Leste.

Fundu Petrolíferu Timor-Leste nian hanesan fundu soberanu ne'ebé harii iha 2005 hodi rekolla depózitu sira ne'ebé halo hosi governu timoroan hosi reseita sira ne'ebé mai hosi petróleu ho gás ne'ebé prodús iha nasaun.

Balansu anual hosi fundu iha tinan 2014 nia rohan maka dolar biliaun 16,5.

"Ho planu sira [hosi investimentu] no ritmu gastu anual sira fundu sei dura besik tinan 10 oinmai. Períudu tempu ne'e bele hanesan sufisiente hodi dezenvolve ekonomia lokal", refere hosi Charles Schinner, ne'ebé konsidera "sala" estratéjia atual hosi governu timoroan ba aplikasaun hosi osan ne'e.

"Diresaun ne'ebé maka governu tuir daudaun maka la haree ba buat sira hanesan agrikultura, bee, edukasaun ka saúde. Sira iha liu interese iha projetu boot sira: mina sira, fábrika sira simenti nian, aeroportu sira, portu boot ida ba ró kontentor sira", investigador ne'e hatutan.

Nia kritika katak gasta sira iha agrikultura, saúde ho edukasaun, hahú tuun iha tinan tolu ikus ne'e.

Nia hatete katak osan ne'e tenki aplika "iha infra-estrutura bázika sira ne'ebé serve ba populasaun sira, no la harii aeroportu sira no refinaria hosi kombustível sira".

Planu governamental atual ba dezenvolvimentu estratéjiku nian tama ona iha aplikasaun tinan dahitu nian. Hatán kona-ba karik planu ne'e bele muda, Charles Schinner konfia ba eleisaun jeral sira tuirmai ne'e.

"Iha eleisaun ida iha fulan rua oinmai. Polítiku timoroan sira agora hatene ona katak petróleu besik hotu ona. Bainhira ami hahú ko'alia katak petróleu sei hotu, iha tinan lima liubá, laiha ema ida maka rona ami. Ema sira aprende, ema sira muda. Até polítiku sira", nia hatete.

SAPO TL ho Lusa