IFJ Sei Kampaña, Jornalista La Merese Tama Prizaun

DILI, (TATOLI) – International Federation Jornalist (IFJ) promete sei halo kampaña makas hodi solidariza problema ne’ebé jornalista Timor-Leste enfrenta, liu-liu kazu Jornalista Raimundo Oki. IFC haree la serve jornalista atu lori ba to’o prizaun.

Advogadu hosi International Federation Jornalist (IFJ), Jim Nolan hateten ba jornalista sira, ohin halo asaun iha Palasiu Governu oin, relasiona ho arguidu Raimundo Oki. Kazu refere Tribunal sei diside iha loron 1 Juñu (julgamentu final).

“Iha 1 Juñu mak tribunál deside katak Raimundo Oki tama kadeia, entaun hosi rezultadu ne’e, ami sei halo kampaña boot hodi fo solidariedade ba jornalista Timor-Leste inklui Raimundo Oki ba nia kazu,” Advogadu IFJ, Jim Nolan promete, iha nia intervista ho Jornalista sira, bainhira partisipa asaun Nonok, ne’ebe organiza hosi Asosiasaun Jornalista ho Timor-Post, Segunda (29/05).

Jim konsidera, Jornalista Raimundo Oki ba tribunál iha 1 Juñu hanesan hamate demokrásia, tanba ne’e, bainhira nia (Oki) hetan duni pena prizaun signifika demokrásia la la’o di’ak ona, entaun hosi desizaun sira ne’e mak akontese nu’udar aktu impedimentu servisu jornalista nia.

International Federation Jornalist (IFJ) sei esforsu hodi hasoru Primeiru Ministru, Rui Maria de Araujo, Ema Partidu Polítiku sira, Sosiedade Sivíl hodi hateten katak labele hamate servisu jornalista no labele hamate liberdade imprensa iha Timor-Leste tanba hahalok ne’e sei hatudu imazen ladiak iha mundu internasionál.

Jornalista: Zezito Silva | Editór: Manuel Pinto

Foto: Jim Nolan, koalia ho Jornalista sira iha asaun Nonok, Segunda (29/05). Foto: TATOLI