Lalenok FC Promovidu Ba Segunda Divizaun

DILI (TATOLI) - Lalenok United FC hamriik ona iha zona seguru. Klube ne´e ofisialmente promovidu ba segunda divizaun Liga Futeból Amadora époka 2018, hafoin halakon Fitun Estudante Lorosa´e (FIEL) FC ho golu 1-0 iha Estádiu Munisipál Dili, domingu lokraik ne´e.

Golu úniku ne´ebé lori Lalenok ba segunda divizaun oferese hosi jogadór avansadu estranjeiru hosi Indonézia, Iman Hambardo, iha minutu 22, liuhusi jogu meais finais (semi finál) apuramentu Liga Futebol Amadora ba promosaun Segunda Divizaun.

Oras ne´e, la´ós Lalenok FC mesak hakat uluk ba segunda divizaun maibé hamutuk ho FC Lero hosi Munisípiu Lautem ne´ebé semana kotuk hakat uluk ona hafoin manán União Tokodede ho golu mihis 2-1.

Enkuantu, Fitun Estudante sei iha oportunidade ka jogu ikus kontra União Tokodede hosi Munisípiu Liquiça iha kuarta (31/5/17) hodi deside ekipa ne´ebé maka sei hakat hodi kompleta qouta ekipa tolu ne´ebé maka atu sa´e hodi troka ekipa 4 ne´ebé maka sei degrada hosi segunda divizaun époka 2017.

Treinadór Fitun Estudante Lorosa´e, Jaco Freitas hateten katak maske sira lakon maibé hatudu jogu furak. Nia konsidera katak Lalenok manán sira ho sorti de´it tanba golu ne´ebé Lelenok rezulta la´ós liuhusi ezekusaun bola moris maibé bola mate.

“Ne´e normál. Ko´alia kona-ba jogu ne´e, sempre ida manán no ida seluk lakon. Ami sei prepara án fali atu bele joga hasoru União Tokodede hodi hadau terseiru lugár. Ami optimista katak sei hakat ba segunda divizaun,” nia informa.

Iha fatin hanesan, Treinadór Lalenok United FC, Muhammad Nico haklaken katak sira merese duni manán jogu ne´e tanba preparasaun ne´ebé másimu. Nia haktuir sira prepara án kleur ona. 

Jornalista: Xisto Freitas

Foto: LFA - Valentino Daniel de Sousa