Timor Post Husu Deskulpa Bainhira Tribunál Aseita Pedidu Rui

DILI (TATOLI) - Sekretáriu Estadu Komunikasaun Sosiál (Sekoms), Nelio Isaac Sarmento observa katak, bainhira Tribunál distrital Dili simu pedidu hosi lezadu Rui Maria de Araújo (Aktual Primeiru Ministru), mídia Timor-Post tenki husu deskulpa ba Rui Maria de Araújo liuhosi públikasaun durante fulan ida, iha pajina Primeiru.

“Ha’u nia pendapat (opinaun-red) se tribunál aseita duni pedidio Rui (Primeiru Ministru-red) nian, Maka seharusnya (tenki-ser) tribunál bele fó mós sentensa, husu ba mídia Timor Post  durante fulan ida públika sira nia kesalahan (erru) no husu diskulpa ba Rui iha halaman pertama (Pajina Primeiru) durante fulan ida,”  Sekretáriu Estadu Komunikasaun Sosiál, Nelio Isaac Sarmento, informa ba Ajensia TATOLI, iha nia knaar fatin, foin lokraik ne’e.

Ba Jornalista Raimundo Oki ho eis diretór Timor-Post Lorenso Martins bele mós aplika sansaun. Ezemplu durante fulan neen labele halo aktividade jornalístiku no husu ba Konsellu Imprensa suspende karteira profissional ba jornalista nain rua ne’e.

Bainhira periodu fulan neen sira nain rua (Arguidu) publika fali notísias ruma ho bosok mak nia knaar nu’udar jornalista automatikamente lakon.

Entertantu Nelio Isaac rekuñese katak, lezadu Rui Maria de Araújo ohin haruka duni karta ida ba Tribunál ho nia kontiudu mak, husu tribunál liuhosi Prokurador jerál atu la bele fó kastigu ka aplika multa ba Mídia Timor-Post inklui Jornalista Raimundo Oki ho eis diretór Timor-Post Lorenso Martins, maibé nu’udar lezadu Rui Maria de Araújo husu atu Tribunál justifika verdade ba públikasaun notisia Timor-Post nian, los ka la’e.

Karta ne’e mós Primeiru Ministru Rui Maria de Araújo haruka ba Tribunál nu’udar individu ne’ebé sai lezadu ba públikasaun Timor-Post nian, no la haruka karta hanesan Primeiru Ministru.

Jornalista Timor-Leste Husu Implementa Lei KomSos

Jornalista Timor-Leste (TL) tantu hosi mídia imprime no elektrónika husu órgaun kompetente husu atu kazu Raimundo Oki ho Lorenso Martins nian, desizaun tomak ne’ebé mak Tribunál sei hola tenki implementa lei komunikasaun sosiál.

Rajaun implementa lei komunikasaun sosial tanba Timor-Leste nu’udar nasaun demokrátiku ne’ebé bandu tebes lori jornalista ba tribunál antes liuhosi mediasaun Konsellu Imprensa, se lori los de’it ba Tribunál konsidera hamate liberdade imprensa.

Entertantu International Federation Jornalist (IFJ) promete sei halo kampaña makas hodi solidariza kazu Jornalista Raimundo Oki, tanba IFC haree la serve jornalista atu lori ba to’o prizaun.

Advogadu hosi International Federation Jornalist (IFJ), Jim Nolan hateten “Iha 1 Juñu mak tribunál deside katak Raimundo Oki tama kadeia, entaun hosi rezultadu ne’e, ami sei halo kampaña boot hodi fo solidariedade ba jornalista Timor-Leste inklui Raimundo Oki ba nia kazu.”

Ministru Públiku mós antes ne’e iha nia alegasaun finál haktuir katak, raimundo Oki ho Lorenso Martins bele sei aplika pena prisaun durante tinan ida, tanba jornalista nain rua ne’e akusadu ho artigo 285 kodigu penal Timor-Leste nian, relasiona ho públikasaun Timor-Post nian ne’ebé deskonfia eis assesor Ministériu Finansas Rekomenda fó projeito ba kompaña Indonezia.

To’o notisia ne’e tun parte TATOLI seidauk halo konfirmasaun ho Midia Timor Post tantu Konsellu Imprensa.

Ekipa Redasaun

Foto: Sekretáriu Estadu Komunikasaun Sosiál, Nelio Isaac Sarmento