quinta-feira, 29 de junho de 2017

Dosente Ensino Superior Maioria Lisensiatura

Tuir dadus husi Ministerio Edukasaun hatudu, katak dosente nain 1222 ne’ebe hanorin iha ensino superior privados no publiku durante ne’e ho nivel edukasaun lisensiatura deit.

Reitor Dili Institute of Tecnology (DIT), Manuel Vong hatete atu atinji kualidade ensino superior ne’ebe ema hotu hakarak, importante tebes investe ba iha profesor sira iha nivel maestradu no doutoramentu. 

Alende ne’e, nia dehan kurikulum tenke diak no politika ne’ebe defende interese universidade nian liu –liu iha ensino aprendizajen, investigasaun sientifika no servisu komunitarios sem intervensaun politiku. 

“Lisensiatura hanorin lisensiatura,, hau hanoin ida ne’e labele, ita tenke investe ba ida ne’e,” nia hateten iha primeiru enkontru ho Ministerio Edukasaun no universitario sira, iha salaun Ministerio Solidaridade Sosial (MSS), Dili. 

Nia hatete, governu tenke hanoin ona atu prepara profesores nivel maestradu no doutoramentu iha area espesializada sira, nune’e to’o iha tinan 2030 Timor oan hotu bele domina mos siensia no teknologia alende lingua.


Nia dehan, DIT rasik iha profesores nain 157 ho nivel edukasaun maestradu no doutoramentu iha area espesializada hanesan engeenaria sivil, mekaniku, petroleu, jestaun komersio, finansas, turismu no siensia komputador. 

Alende ne’e, nia dehan sira mos iha profesores ho nivel lisensiatura ba area lingua Portugues no Ingles, e sira haruka ona balun ba foti maestradu lingua nian iha rai liur. 

Nia hatutan, DIT mos simu estudantes foun sukat ho kapasidade tanba ne’e kada tinan simu estudante foun 700 deit. 

Iha parte seluk, Sekretario Nasional Timor –Leste Coalition for Education (TLCE), Jose de Jesus hateten antesedensia edukasaun profesores sai mos fator ida husi seluk ne’ebe implika ba kualidade ensino nian. 

“Lolos profesores nivel lisensiatura labele hanorin calon lisensiatura, maibe ida ne’e akontese liu –liu iha universidade privado sira,” nia preokupa.

Alende ne’e, nia dehan iha mos fator seluk ne’ebe kontribui ba iha kualidade hanesan falta fasilidade biblioteka, livrus no komitmentu estudante ida–ida atu estuda menus liu.

Paulina Quintão | The Dili Weekly

Sem comentários: