quarta-feira, 28 de junho de 2017

Ekipa observador sira hosi UE destaka ona ba munisípiu sira

PARTILHAR
Ekipa hamutuk 13 hosi observador sira UE nian ba eleisaun lejislativu sira loron 22 Jullu iha Timor-Leste hahú desloka ona iha loron-tersa ne'e ba munisípiu timoroan tomak ne'ebé sira sei akompaña prosesu tomak hosi votasaun no kontajen hosi rezultadu sira.

"Hanesan observador sira ne'ebé maka la'o daudaun ba sira nia área responsabilidade sira no ne'ebé maka sei hela to'o semana ida hafoin votasaun hodi akompaña prosesu tomak", esplika ba Lusa hosi Xabier Meilan, "númeru daruak" hosi misaun observasaun eleitoral UE nian iha Timor-Leste.

Observador sira - ne'ebé antes halo ona viajen ba munisípiu 13 hosi nasaun nian simu ona formasaun preliminar ida iha Díli - hetan apoiu hosi ekipa sentral ida ho elementu na'in ualu, na'in hitu iha ona Timor-Leste dezde loron 03 Juñu.

Elementu daualuk hosi grupu, eurodeputada baska Izaskun Bilbao Barandica ne'ebé lidera misaun observasaun eleitoral (MOE), sei to'o iha Díli iha inísiu fulan-Jullu.

Estrutura tomak hosi MOE sei apoia mós hosi espesialista na'in lima iha lojístika no seguransa.

Xabier Meilan esplika katak loron rua hafoin votasaun sei aprezenta relatóriu preliminar ikus no, karik liutiha fulan ida maka fó sai relatóriu final kompletu.


"Misaun ki'ik ida hosi eurodeputadu sira sei mai bainhira besik votu", nia esplika.

Responsável europeu konsidera ona hanesan "sedu tebes" ba avaliasaun ida, no fó hanoin katak ne'e hanesan votu daruak ne'ebé maka organiza rasik hosi autoridade timoroan sira, hafoin eleisaun prezidensial sira iha fulan-Marsu ikus ne'e.

"Ami haree ona iha prezidensial sira katak Sekretariadu Tékniku hosi Asisténsia Eleitoral (STAE) no Komisaun Nasional Eleisaun nian (CNE) konsege hala'o sira nia knaar ho profisionalizmu no imparsialidade. Agora iha teste boot ida, ho kandidatura hamutuk 21", Meilan hatete.

Tuir nota ida hosi MOE, objetivu misaun nian maka "analiza kuadru jurídiku, serbisu hosi administrasaun eleitoral, atividade sira hosi kampaña hosi kandidatu sira no partidu polítiku sira, asaun hosi meiu komunikasaun sira, votasaun ho kontajen, prosesu reklamasaun sira no rekursu sira no anúnsiu hosi rezultadu sira".

Hodi kumpri objetivu sira, observador sira hasoru malu "ho funsionáriu governamental sira no eleitoral sira no reprezentante sira hosi partidu polítiku sira, judisiáriu, organizasaun sira hosi sosiedade sivil no meiu komunikasaun sosial".

Misaun funsiona tuir "Deklarasaun hosi Prinsípiu sira ba Observasaun Eleitoral Internasional", adoptadu ho protesaun hosi ONU iha 2005. Observador sira sei iha ligasaun ho Kódigu Konduta ida ne'ebé garanti neutralidade rigorozu bainhira hala'o sira nia knaar, tuir nota hanesan ne'e.

Observador europeu iha Timor-Leste hodi hatán ba konviti ida hosi Governu no autoridade eleitoral timoroan sira nian.

Eleitor timoroan sira hamutuk 764.858 ne'ebé resenseadu ba votu loron 22 Jullu sei iha oportunidade hodi hili membru sira na'in 65 hosi Parlamentu Nasional nian.

Kampaña eleitoral ba votu, ne'ebé aprezenta ona kandidatura hamutuk 21, hahú iha loron 20 Juñu liubá no hala'o to'o loron 19 Jullu, sei iha depois loron rua reflesaun nian antes votu nasional.

Autoridade eleitoral timoroan sira sei instala asembleia votu hamutuk 1.121 iha sentru votasaun sira hamutuk 859, no pelumenus hitu sei funsiona iha estranjeiru, iha Austrália, Koreia-Súl, Portugal ho Reinu Unidu.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: