quarta-feira, 28 de junho de 2017

Governu timoroan aprova apoiu dolar millaun 1,5 ba vítima sira hosi inséndiu iha Portugal

PARTILHAR
Iha loron-tersa ne'e Governu timoroan aprova ona pakote ida asisténsia nian hamutuk dolar millaun 1,5 (euro millaun 1,33) iha ajuda humanitáriu hodi apoia vítima sira hosi inséndiu florestal sira iha fulan ne'e.

Avelino Coelho, sekretáriu Estadu hosi Konsellu Ministru sira, hatete ona ba jornalista sira katak desizaun ne'e aprova ona iha reuniaun Governu nian iha loron-tersa ne'e ne'ebé renova ona votu pezar nian ba família sira hosi vítima sira inséndiu nian.

Fundu sira ne'e sei kontabiliza iha komponente apoiu humanitáriu nian hosi Orsamentu Estadu 2017 nian.

Pelumenus ema na'in 64 mate ona no ema na'in 150 resin maka kanek iha rezultadu hosi inséndiu ida ne'ebé akontese iha Pedrógão Grande, iha distritu Leiria, ne'ebé hafoin ne'e to'o mós iha distritu sira Castelo Branco ho Coimbra.

Inséndiu haan ona ai-laran besik 26.000 hektar, haktuir hosi informasaun hosi Sistema Europeu Informasaun nian hosi Inséndiu Florestal nian, estrada uma barak no sasán privadu sira seluk.


Antes, Governu timoroan hatudu ona pezar ba "katástrofe" no "ema sira ne'ebé mate", felisita serbisu ne'ebé maka bombeiru sira halo nafatin.

"Lakon ema nia moris hanesan trájiku tebes. Povu Timor-Leste nia pensamentu no orasaun hamutuk nafatin ho ami nia maun-alin sira iha Portugal", primeiru-ministru timoroan, Rui Araújo, hatete iha mensajen ida ne'ebé fó sai iha portal Governu nian.

Nota refere katak "koñesimentu estadu nian hosi katástrofe no ba vítima mortal sira relasionadu ho inséndiu sira ne'e" halo ezekutivu "haruka ona mensajen ida solidariedade nian" ba Governu no povu portugés.

"Governu Timor-Leste aprezenta nia kondolénsia ba família sira no belun sira hosi ema sira ne'ebé lakon ona sira nia moris no haruka ona mensajen ida apoiu nian ba Prezidente Marcelo Rebelo de Sousa no ba primeiru-ministru António Costa, iha momentu susar ne'e", refere hosi komunikadu.

"Governu husik mós liafuan ida rekoñesimentu nian ba serbisu ne'ebé maka halo hosi bombeiru sira no elementu sira seluk intervensaun lokal nian, ne'ebé hasoru ho korajen kondisaun sira ne'ebé susar tebes", nia subliña.

Prezidente Repúblika mós, Francisco Guterres Lu-Olo, hatudu mós nia laran-triste no solidariedade ho vítima sira inséndiu nian ne'ebé maka akontese iha zona Pedrógão Grande no iha fatin sira seluk iha sentru Portugal nian.

"Hanesan ho tristeza maka ami akompaña notísia sira kona-ba inséndiu sira ne'ebé akontese iha Pedrógão Grande. Hodi Estadu no povu Timor-Leste nia naran ha'u hakarak hatudu ami nia sentida kondolénsia ba família sira ne'ebé iha lutu no ami nia solidariedade ho povu irmaun hosi Pedrógão Grande", nia hatete liuhosi komunikadu.

SAPO TL ho Lusa
PARTILHAR

Author: verified_user

Publicação luso-timorense sem fins lucrativos

0 comentários: