terça-feira, 27 de junho de 2017

Kaer Ukun, FRETILIN La Husik Ministru Komete Korrupsaun


ERMERA: Partidu FRETILIN kompromete bainhira hetan fiar husi povu atu kaer ukun iha períodu 2017 to’o 2022 sei la husik nia ministru ida atu pratika halo korrupsaun iha governu.

Adjuntu Sekretáriu Jerál Partidu FRETILIN José Reis hateten, se bainhira FRETILIN fila fali ba ukun partidu tenke forte, militante sira tenke forte liu atu tau matan ba parlamentu, atu tau matan ba governu hodi servisu ho loloos ba rai ida ne’e.

“Ita sei labele husik ita nia ministru ida halo korrupsaun iha ne’ebá, ida ne’e maka ita FRETILIN buka partidária atu tau matan ba governu akompaña Parlamentu ne’e maka ita polítiku FRETILIN nian”. Dehan nia liu husi komísiu Polítika loron dalimak iha munisípiu Gleno‐Ermera, Sábadu (24/06).

Nia dehan, tenke hakribi korrupsaun no halakon nepotizmu, maibé realidade maka iha oin dehan hapara korrupsaun, maibé fila ba kotuk halimar nafatin ho korrupsaun, ne’e maka FRETILIN hakarak ukun para atu hamoos korrupsaun iha Timor ne’e.


FRETILIN ukun, nia dehan, la'ós husi ba Komisaun Anti Korrupsaun (KAK) maka atu haree mesak korrupsaun, governu tenke servisu hamutuk KAK, kria lei ida ne’ebé dignu atu nune’e bele haforsa servisu KAK atu bele julga ema se de'it maka hakarak koko atu halimar ho korrupsaun.

Tanba, FRETILIN mai ho prinsípiu ida katak bainhira atu harii dezenvolvimentu tenke ho kualidade liu husi hakribi matan kanten ka matan naklosu, liman labele katar atu simu no bolsu labele boot atu tau envelope nakonu.

Investe Setór Agrikultór

Sekretáriu Jerál Partidu Frente Revolusionáriu Timor Leste Independente (FRETILI) Marí Alkatiri hateten, Timor Leste tenke investe didi'ak ba iha setór agrikultura nian atu nune’e TL labele laran metin ba osan fundu mina rai nian.

“Ita investe makas iha agrikultura ho didi'ak osan reseita mai husi agrikultura sei boot liu ita nia osan mina rai ninian.” Dehan Marí liu husi Komísiu Polítika ba kampaña dalimak nian iha munisípiu Ermera‐Sábadu (24/06).

Tanba ne’e, FRETILIN kaer ukun hakarak haburas no investe iha setór agrikultura atu garante fundu ba osan mina rai nian bele mohu, maibé agrikultura nian nunka bele mohu.

TL nia ekonomia, nia dehan, ekonomia TL labele depende de'it bainhira iha udan iha natar no bainhira laiha udan natar laiha fali, tenke halo infraestrutura ba bee ho didi'ak atu garante katak bele la udan maibé natar iha nafatin.

Nia hateten bee importante, se TL la kuidadu iha tinan lima(5) nia laran sei la harii infraestrutura ho di'ak iha tempu udan satan netik bee aban bainrua TL sei maran.

Kampaña ba dalimak ne’e hetan partisipasaun husi militante no simpatizante partidu nia másimu tebes tuir kalkula kuaze rihun lima resin, no militante ne’ebé marka prezensa ba kampaña ne’e mai husi postu lima(5) hanesan Atsabe, Ermera, Hatulia, Letefoho no Rai laku no lao hakmatek tanba hetan seguransa husi PNTL no Observadora STAE no PDHJ.

FRETILIN Hatudu Kapasidade iha Oekusi

Adjuntu Sekretáriu Jerál FRETILIN José Reis hatete, FRETILIN hatudu nia kapasidade atu lori povu sai husik kiak no mukit tanba hatudu ona modelu dezenvolvimentu ne’ebé halo iha ZEESM.

José Reis dehan, sekretáriu jerál FRETILIN Mari Alkatiri hatudu ona nia kapasidade ukun iha Oekusi nu'udar dalan ba libertasaun do povu.

“Realidade hatudu tinan rua de'it lidera Oekusi, Sekretáriu Jerál Partidu FRETILIN (Dr. Mari Alkatiri) konsege halo Oekusi nu'udar ezemplu ba dezenvolvimentu nasionál,” dehan José Reis iha kampaña Partidu FRETILIN iha Maliana (23/06).

Rezultadu dezenvolvimentu iha Oekusi, José Reis dehan, sai ona trunfu boot ba Sekretáriu jerál FRETILIN oinsá organiza ema no halo dezenvolvimentu.

José Reis dehan, ministru balun ukun iha Governu AMP to’o mai Kintu Governu Konstitusionál hahú laran taridu, hodi reklama fali dehan projetu sira ne’e sira mak integra ba autoridade Oekusi, ne’e sala.

“Projetu ne’e dezeñu ida, se mak halo konsulta mak halo, segredu ba susesu atu transforma projetu ba realidade ho kualidade iha rai mamuk ida nia leten,” dehan José Reis.

Mari Alkatiri, Tuir José Reis hatudu katak nia iha kapasidade atu garante halo jestaun servisu tomak atu halo mehi ne’ebé bolu naran projetu sai realidade no iha kualidade.

“Bainhira atu harii buat di'ak ida iha rai mamuk ida nia leten, ita nia matan labele kaan, liman labele katar atu simu, no bolsu labele boot atu subar fali envelope sira ne'ebé nakonu,” dehan José Reis.

Independente

Sem comentários: