sexta-feira, 30 de junho de 2017

PM: Diskriminasaun ho violénsia hasoru joven sira LGBT iha Timor-Leste prejudika nasaun

PARTILHAR
Iha loron-kinta ne'e primeiru-ministru timoroan kondena ona diskriminasaun no violénsia hasoru membru sira hosi komunidade LGBT, inklui hosi sira nia família rasik, hodi destaka kontributu importante ba dezenvolvimentu Timor-Leste nian.

Maski Timor-Leste esforsa iha promosaun ba direitu ema sira nian, inklui mós ba komunidade Lésbika, Gay, Biseksual, Travestis, Transeksual ho Transjéneru sira (LGBT), "sira barak sei hetan nafatin diskriminasaun", hatete hosi Rui Maria de Araújo.

"Joven balun sei moris iha situasaun sira violénsia nian, dalabarak hosi ema sira ne'ebé besik sira. Violénsia hanesan krimi. Diskriminasaun hanesan krimi. Labarik sira no joven sira mós hanesan Timor-Leste nia rikusoin no violénsia afeta futuru hosi saúde fízika no mental nasaun nian", nia konsidera.

Iha mensajen ida relasionadu ho Loron Orgullu nian, ne'ebé selebra mós iha loron-kinta ne'e ho marxa ida iha Díli, xefe Governu afirma ona katak "ema tomak iha potensial hodi kontribui ba dezenvolvimentu nasional".


Governante konsidera ona katak hanesan intolerável halo diskriminasaun ka la respeita ema sira "ho baze hosi nia orientasaun seksual ka identidade jéneru nian", nia konsidera katak futuru nasaun nian depende hosi labarik sira no joven sira "ne'ebé moris iha ambiente ida protesaun nian no domin nian", hodi sira bele dezenvolve nia potensial.

"Ha'u husu ba ema tomak hodi aseita, hodi respeita malu maka'as. Prinsípiu sira nasaun demokrátiku nian maka atu ema tomak moris iha liberdade, ho dignidade no respeitu maka'as. Hamutuk, ita bele harii nasaun inkluzivu ida ne'ebé ema tomak partisipa iha prosesu dezenvolvimentu nian", nia hatete.

Organizasaun timoroan oioin, halo parte iha rede joven Hatutan, promove semana ne'e atividade oioin hodi kombate diskriminasaun no violénsia ne'ebé halo hasoru membru sira hosi komunidade LGBT.

Maski laiha informasaun estatístiku kona-ba dimensaun hosi problema, Hatutan simu relatu oioin hosi "ema barak ne'ebé admiti katak sira sai hanesan vítima hosi abuzu fíziku sira, ka duni sai hosi uma, ka sai vítima hosi "bullying" iha eskola sira, tanba orientasaun seksual ka identidade jéneru nian".

"Dalabarak la liga ho kazu sira ne'e tanba falta koñesimentu ka entendimentu públiku hosi problema, inklui hosi parte autoridade polísia sira, judisial sira ka lejislativu sira", organizasaun ne'e explika iha pájina.

Tema hosi debate sira no marxa sira ne'ebé halo iha loron-kinta ne'e maka "kria ambiente seguru ida ba komunidade LGBT".

SAPO TL ho Lusa | Foto@ Porter Binks/EPA
PARTILHAR

Author: verified_user

Publicação luso-timorense sem fins lucrativos

0 comentários: