Adia fila fali leitura sentensa ba kaben-na'in portugés sira ne'ebé prezu iha Díli

Iha loron-sesta ne'e adia fila fali ba dala rua leitura ba desizaun ikus iha julgamentu hosi kaben-na'in portugés sira ne'ebé prezu iha Díli kuaze tinan tolu resin, to'o loron 11 Agostu, hodi esklarese informasaun kona-ba prova adisional sira ne'ebé introduz hosi juís sira rasik.

Iha semana ne'e ba dala rua ona maka arguidu sira Tiago ho Fong Fong Guerra tenki rona Tribunal Díli adia leitura ba sentensa iha julgamentu ne'ebé hahú hosi fulan-Outubru 2014, bainhira kaer kaben-na'in ne'e, ba dala uluk, iha Díli.

Adiamentu ne'e husu hafoin defeza aprezenta tiha rekerimentu ida ba tribunal hodi husu atu bolu espesialista ida hodi klarifika diverjénsia sira kona-ba transferénsia rua ne'ebé halo hahú hosi konta ida iha Makau.

Diverjénsia sira ne'e iha relasaun ba transferénsia rua ne'ebé halo iha fulan-Dezembru 2011 ne'ebé tribunal identifika hanesan levantamentu osan sira nian - ida maka ho folin dolar rihun 800 resin - maibé defeza insisti relasionadu ho transferénsia ba Estadus Unidus.

"Defeza konsidera katak agora daudaun bele iha diverjénsia sira ka susar sira iha análize hosi dokumentu sira relasionadu ho transferénsia rua ne'ebé halo hosi Olive Macau, uza konta ida iha BNU Makau ba Estadus Unidus", esplika hosi Álvaro Magalhães, advogadu ida defeza nian.

"Transferénsia sira ne'e hala'o iha termu sira ezekusaun nian hosi akordu Escrow ida", nia subliña no nune'e maka husu ba tribunal "indikasaun hosi espesialista bankáriu ida ka ema ruma ho koñesimentu iha área hodi analiza dokumentu sira ne'e".

Tribunal hatete katak sei fó hatene Banku Sentral Timor-Leste hodi indika espesialista ida iha transferénsia internasional sira hodi bele ko'alia iha sesaun loron 11 Agostu nian no ajuda klarifika asuntu ne'e.

Leitura ba desizaun ikus nian antes previstu ba loron-segunda liubá, maibé adia tiha ba loron-sesta ne'e hafoin grupu hosi juís sira rasik hatama ona, iha sesaun leitura hosi desizaun nian, alterasaun sira ne'ebé la'ós substansial hosi faktu sira.

Defeza antes la konkorda tanba juís sira introduz material ne'e bainhira halo tiha ona alegasaun ikus sira iha kazu no bainhira desizaun ne'e prontu ona atu le.

"Ha'u iha ona desizaun prontu", hatete hosi juíza Jacinta Correia, ne'ebé maka prezidi koletivu ne'ebé julga ona kazu, iha sesaun loron-sesta nian.

Juíza esplika katak halo ona ajendamentu ba loron audiénsia seluk hodi bainhira hahú ona férias judisial sira, maibé hodi evita atu labele lakon prova sira kazu nian.

Adiamentu hanaruk tan kazu ida ne'ebé hahú ona dezde fulan-Outubru 2014, bainhira kaer Tiago no Fong Fong Guerra iha Dìli, sidade ne'ebé, hahú tempu ne'ebá, sira hetan bandu hodi labele sai.

Julgamentu ne'e hein hela desizaun ikus iha loron 27 Juñu liubá hafoin Ministériu Públiku ho defeza fó sai tiha ona justifikasaun ikus sira.

Sesaun hodi le desizaun ikus sira, iha loron-sesta ne'e, hamosu interese maka'as tebes no iha sala prinsipal hosi Tribunal Distrital Díli nian iha ema koñesidu oioin, inklui eis-Prezidente timoroan José Ramos-Horta, reprezentante sira hosi korpu diplomátiku, inklui hosi embaixada sira Portugal ho Uniaun Europeia nian, hosi Banku Mundial no hosi ONU, no sira seluk nian.

Tiago ho Fong Fong Guerra hetan julgamentu ba krimi sira naok, brankeamentu kapital sira no halo dokumentu falsu sira no sentru ba kazu maka transferénsia ida ho folin dolar rihun 859 (euro rihun 792), halo iha 2011 hosi konsultor norte-amerikanu ida, Bobby Boye.

Iha alegasaun ikus sira, no ba krimi naok no brankeamentu kapital nian, Ministériu Públiku husu de'it kadeia tinan ualu ba arguidu ida-idak, aleinde selu indemnizasaun ida ho folin dolar 859.706 ho juru hahú hosi tinan 2011.

Iha fatin seluk, defeza husu ona absolvisaun, hodi konsidera katak hafoin sesaun hitu julgamentu nian "akuzasaun la konsege hatudu faktu sira ne'ebé bele duun no lori arguidu sira ba kondenasaun".

Tiago Guerra kaer ba interogatóriu iha loron 18 Outubru 2014, pasa loron tolu iha eskuadra ida no iha loron 21 fulan hanesan ba iha Tribunal Díli bainhira juíz haruka hatama nia ba prizaun preventivu iha kadeia Bekora, ne'ebé prezu to'o loron 16 Juñu 2015.

Hahú hosi tempu ne'ebá, hanesan mós nia feen, hetan Termu Identidade no Rezidénsia (TIR) no labele sai hosi nasaun.

SAPO TL ho Lusa