Alunus 38 Lahetan Direitu ba Osan 0.25

Estudantes husi Ensino Baziku Filial Rumbia, Kaikoli, nain 38 la hetan osan sentavus 25 kada loron, ne’ebe Parlamentu Nasional aprova ba programa merenda eskolar.

Koordenador EBF Rumbia, Abilio Pereira da Conceição rekonese problema ne’e tanba husi total alunus 801, maibe Ministerio Finansas aloka osan ba labarik nain 763 deit.

Nia informa, husi eskola fo dadus ne’ebe kompletu ba Ministerio Edukasaun maibe to’o ikus atu foti osan hodi implementa programa merenda eskolar alunus balun laiha direitu.

Nia deskonfia, failansu ne’e iha administrasaun Ministerio Edukasaun nian tanba ema ida mak lee no ida seluk hakerek iha sistema, entaun dala ruma konfundi ho pronunsia bele hakerek sala iha sistema.

“Maibe la signifika sira ne’ebe la hetan ne’e la han, sira han hotu, so que hahan mak la ekilivre tanba osan ne’ebe ki’ik no tenke fahe fali sosa fos,” nia hateten.

Nia informa, kada loron eskola Rumbia gasta $190,75 hodi sosa fos 25kg, kada saka $13,50 no loron ida presiza fos saka tolu hodi tein ba alunus sira, entaun restu oituan hodi sosa fali modo, aifuan no sasan ki’ik sira seluk hanesan masin, mina.

Kona ba menu, nia dehan iha Segunda no Tersa-feira estudante sira han etu ho modo (naan bifi), Kuarta no Kinta-feira han paun ho hemu xa, Sexta-feira han aifuan (halo kolak).

Iha parte seluk, Jerente programa Timor –Leste Coalition For Education (TLCE), Matias do Santos konsidera ne’e diskriminasaun bo’ot ne’ebe ministerio halo hasoru estudantes tanba sira iha direitu atu hetan osan ne’e kada loron.

“Sira bele han, maibe ida ne’e diskriminasaun ida tanba sira iha direitu atu hetan osan ne’e tanba sa la hetan,” nia kestiona.

Tanba ne’e, nia husu ba ministerio atu halo investigasaun ba ida ne’e hodi rezolve, tanba ne’e tendensia ne’ebe ladiak, lolos labarik sira ne’e iha direitu atu hetan osan ne’e.

Paulina Quintão | The Dili Weekly