Despaxante Utiliza Ona Sistema Asycuda Mundiál

DILI, (TATOLI) – Diretór Jerál Alfándega, Ministériu Finansa, José António Fátima Abilio informa Sitema Aycuda World (mundiál) ne’ebé Alfándega implementa la’o ona tanba  despaxante hamutuk 32 no shipping agency hotu-hotu haruka ona sira-nia manifestu bill of lading, packing list no invoice liuhusi sistema eletrónika ida ne’e.

Antes ne’e Alfándega uza sistema Asycuda ++ ne’ebé implementa dezde tinan 2003 maibé depois implementa tiha projetu pilotu Asycuda World iha tinan 2013, oras ne’e despaxante no ajénsia sira utiliza ona sistema ne’e hodi haruka sira-nia manifestu nune’e fasilita servisu ho la’o lalalis liu.

Despaxante ne’ebé rejistadu iha Diresaun Jerál Alfándega dezde tinan 2000 to’o 2017 hamutuk 32 ne’e, antes atu utiliza sistema ne’e, Alfándega iha nia kritéria rasik katak fó formasaun depois sujeita ba teste ho baze méritu  no kuandu valór lato’o sei lapasa.

“Balun halo ezame liu kedan, balun lakonsege liu no tenke tuir fali treinamentu no agora sira 32 ne’e liu hotu ona no ami mós fó ona sertifikadu tinan rua ba sira depois tinan rua mai halo fali avaliasaun ba sira no halo fali ezame nune’e sira abtu duni ona ka seidauk”, José hatete iha edifísiu tuan Ministériu Finansa nian, ohin.

Tanba servisu Alfándega, servisu ida dinámiku no tenke ajusta aan ho kazu no lei sira ne’e, nune’e formasaun tenke iha nafatin.

“Sira hetan ona sertifikadu no ami fó asesu ba sira, no iha kritériu ida ne’ebé ami fó ba despaxante katak sira tenke iha edifísiu rasik, prosesu dokumentu iha sira-nia fatin, sira-nia fatin prienxe kritériu ka la’e iha internét, no sira mós tenke hatama garantia banku, ne’e mak ami foin bele fó autorizasaun”.

Alfándega atualiza sistema informátika atuál Asycuda tanba sei fasilita proseu importasaun no esportasaun sasán sira nomós haforsa integridade Alfándega nian.

Asycuda iha atu automatiza sistema ba dadus sira Alfándega nian mak sistema komputerizadu ida ne’ebé mak kobre maioria prosedimentu sira komérsiu rai-liur. Asycuda mak sei atende manifestu no deklarasaun audaneira, prosedimetu kontabilidade nian, prosedimentu tránzitu no inserteza sira-nian.

Benefísiu husi Asycuda Mundiál nian mak hamosu dadus komersiál sira ne’ebé mak bele uza ba análiza estatístika ekonomia nian. Tanba sistema kodifikasaun armonizadu, mak Asycuda bele halibur dadus husi kada sasán ne’ebé mak tama ka sai husi Timor-Leste no informasaun ida ne’e sei rai iha servisu estatístika nian.

Jornalista: Maria Auxiliadora | Editora: Rita Almeida

Foto: Diretór Jerál Alfándega, Minstériu Finansa, José António Fátima Abílio. Foto/Egas Cristovão.