DILI,
(TATOLI) – Kampaña eleisaun parlamentár, governu la tau artigu ida iha lei
eleisaun lejislativa nian hodi proteje labarik minoridade ne’ebé involve iha
kampaña.
“Komisaun
direitu labarik haree katak lei eleisaun la regula artigu ida kona-ba protesaun
labarik sira iha tempu kampaña tanba ne’e governu tenke toma atensaun”, hateten
Komisariu Komisaun Nasionál Direitu Labarik, Maria Barreto ba jornalista sira
iha salaun konferénsia imprensa iha Provedoria Direitu Umanu no Justisa,
Kaikoli, ohin.
Nia
rekoñese preokupasaun públiku durante ne’e la’o iha ámbitu kampaña eleitorál
kona-ba partisipasuan labarik idade minór ho razaun governu la koloka artigu
ida hodi regula partidu polítiku sira, regula inan aman sira no regula entidade
hotu atu labele involve labarik iha tempu kampaña.
Komisaun
direitu labarik husu ba governu atu tau atensaun ba artigu ruma iha lei
eleisaun nian atu bele trata festa demokrásia ne’ebé sei akontese tan iha
futuru.
“Lei
eleisaun, governu keta haluha katak artigu ida tenke tau atu bele proteze
labarik iha tempu kampaña ne’ebé mai tanba partidu polítiku labele uza labarik
ba interese partidu nian”, salienta nia.
Entretantu,
Provedór Direitu Umanu no Justisa, Silveiro Pinto Baptista informa, rezultadu
observasaun hosi (PDHJ-sigla portugés) iha kampaña eleitorál hatudu prezensa
labarik iha tempu kampaña bazeia ba observasaun hamutuk pursentu 83.2.
Maibé
razaun sira hosi inan aman katak sira lori nia oan tanba ema hein iha uma
laiha, fatin kampaña besik uma komunidade, múzika lian makas atrai labarik sira
ba partisipa sente hanesan festa, labarik sira mak bolu malu ba partisipa iha
kampaña no kampaña besik eskola fó impaktu profesór sira haruka fila estudante
sira.
Nune’e
mós partidu polítiku sira balun utiliza labarik sira iha tempu kampaña ho
atividade sira mak hanesan, dansa tradisionál eh tara tais, labarik sira uza
atributu partidu, labarik sira pinta isin lolon no tula iha motor no kareta
halo konvoi.
Bazeia
ba observasaun PDHJ nian katak labarik sira ne’ebé involve atividade sira ne’e
ho pursentu 33.
Alémde
ne’e, bazeia ba observasaun PDHJ iha terenu katak atendimentu seguransa ba
labarik sira di’ak tebes hanesan iha munisípiu Kovalima, polísia halo nia
servisu ho profesionál hodi hapara konvoi kareta ho motor ne’ebé tula labarik
iha laran maibé munisípiu balun la akontese nune’e.
Nune’e
mós, observasaun PDHJ nian hatudu katak kampaña eleitorál ne’ebé besik fatin
públiku ne’ebé lei bandu mak hanesan besik igreja ho pursentu 15.7, besik
eskola ho pursentu 25.5 no besik klínika eh ospitál ho pursentu 5.4.
Enkuantu,
PDHJ konsidera eskola no klínika hanesan fatin ne’ebé labele besik fatin
kampaña tanba eskola nudar fatin estuda no klínika nudar fatin pasiente hodi
konsulta no deskansa.
Biar
nune’e, Polísia Nasionál Timor-Leste (PNTL) ne’ebé fo seguransa iha kampaña
eleitorál halo diskriminativu tanba sira la marka prezensa kuandu iha mini
kampaña ka diálogu.
Maibé
PDHJ apresia ba PNTL ne’ebé prende motorizada viola regra tránzitu ho pursentu
17.3, hanesan uza kanu resin, la uza kapasete, la uza sapa matríkula.
No
mós partidu polítiku sira la tuir oráriu kampaña ne’ebé estabelese hosi CNE ho
pursentu 34.3 no partidu polítiku sira la fó oráriu ba CNE bainhira muda
kampaña.
Observasaun
PDHJ durante eleisaun, STAE estabelese sentru votasaun iha ospitál referrál no
nasionál de’it ho pursentu 33.3 maibé durante eleisaun, PDHJ identifika katak
iha postu saúde no sentru saúde iha pasiente baixa no nia família ne’ebé hein
labele vota.
Iha
sentru votasaun balun ne’ebé nia kondisaun labele asesu ba ema ho defisiénsia
no PDHJ apresia ba seguransa nia durante eleisaun.
PDHJ
nu’udar instituisaun independente Estadu nian ne’ebé estabelese hodi proteje no
promove direitu umanu no promove governasaun di’ak iha Timor-Leste.
Jornalista:
Zezito Silva | Editora: Rita Almeida
Foto:
Mensajen hosi Komisaun Nasionál ba Labarik.
Sem comentários:
Enviar um comentário