Governu Lansa Sistema Digitalizasaun Saúde

DILI, (TATOLI) – Sestu governu konstitusionál liuhosi Primeiru Ministru (PM), Rui Maria de Araújo, ohin, lansa sistema digitalizasaun saúde iha Ospitál Nasionál Guido Valadares (ONGV) Bidau Dili.

“Lansamentu sistema dijitalizasaun saúde iha ONGV inklui sentru saúde neen iha munisípiu Dili, ospitál rejionál Baukau, ospitál referénsia Maliana, Maubisse, Suai no Oecusse”, tenik Diretór Ezekutivu ONGV, José Antonio Gusmão.

Alende ne’e, inagura mós  klínika moras la daet ne’ebé halo sei atende moras sira hanesan moras fuan, hipertensaun, diabete no seluk tan. Sei iha klínika tolu ne’ebé sei atende moras refere.

Nia mós informa, biban ida ne’e hakarak mós halo inagurasaun ba unidade ka departementu formasaun klínika record maibé tanba asuntu tékniku labele halo, maibé sistema digitalizasaun sei estabelese iha unidade ne’e nia laran.

Nune’e Diretór Ezekutivu ne’e hato’o agredesimentu ba PM tanba ninia idéia inovativu no kreativu hakarak utiliza sistema atu hadi’a jestaun no governasaun.

“Hanesan pessoál saúde ida ne’ebé servisu iha Ministériu Saúde nia okos, sente orgullu tanba instituisaun ne’e mak hahú implementa sistema dijitalizasaun iha governasaun ne’e”, katak tan.

Nia haktuir, antes sistema ne’e lansa fulan hirak liu ba iha Laulara, servisu saúde voluntáriu sira no ohin liuhosi gabinete PM no sestu governu konstitusionál hakarak halo mós lansamentu hanesan iha fasilidade a’as liu no sei hahú iha sentru saúde sira iha Dili laran.

Sistema ne’e implementa hodi halo atendimentu ba pasiente nia moras, iha farmasia, laboratóriu, unidade no departementu pessoal saúde sira.

Nune’e, José Antonio espera pessoál saúde sira  bele aprende, hakarak ka lakohi tenke liu sistema, maske la toman maibé agradese tanba durante ne’e iha treinamentu husi gabinete PM no agora pessoál saúde bele uza duni no se forma sira seluk atu bele dijitaliza hotu sistema.

Nia esplika tan, sistema saúde ne’e implementa iha timor laran tomak, nune’e bainhira iha moras ne’ebé refere husi ospitál rejionál sira, bele asesu ba dadus hotu-hotu konaba pessoál nia moras ne’ebé durante ne’e ekipa Ministériu Saúde (MS) hala’o durante besik tinan rua hodi la’o husi uma ba uma ne’ebé hanaran saúde na família.

Seremónia ida ne’e realiza hodi komemora aniversáriu dahuluk loron nasionál saúde ne’ebé monu iha 22 jullu maibé tanba eleisaun parlamentár muda ba ohin loron.

Lansamentu ne’e hetan partisipasaun husi PM, Vise MS, Ana Isabel Soares, reprezentante korpu diplomátiku sira, ezekutivu no pessoal saúde no konvidadu sira.

Jornalista: Julia Chatarina | Editora: Rita Almeida

Foto: Primeiru Ministru akompaña hosi Vise Ministra Saúde no Diretór Ezekutivu Ospitál Nasionál Guido Valadares iha serimonia lansamentu ba sistema dijitalizasaun saúde, ohin, iha ONGV Bidau Toko Baru. Foto GPM