sexta-feira, 28 de julho de 2017

Horta Prefere FRETILIN ho CNRT Halo Koligasaun

DILI, (TATOLI) – Eis Prezidente Repúblika, José Ramos Horta hatete atu asegura programa Planu Estratéjiku Dezenvolvimentu Nasionál (PEDN) no obra sira seluk ne’ebé eis Primeiru Ministru, Xanana Gusmão husik hela, partidu Frente Revolusionariu Timor-Leste Indepéndente (FRETILIN) no Kongresu Nasionál Rekonstrusaun Timor (CNRT-sigla portugés) tenke halo koligasaun harii Sétimu Governu Konstitusionál.

“Ha’u nia opiniaun, doutór Marí Alkatiri no señor Kay-Rala Xanana Gusmão maka reprezenta jerasaun rezisténsia tenke túr hamutuk hodi haree governasaun saida maka di’ak liu”, hatutan Horta ba jornalista sira iha Palásiu Prezidensiál Nicolau Lobato, Bairo Pite, ohin, hafoin enkontru ho Prezidente Repúblika, Francisco Guterres Lú-Olo hodi ko’alia konaba estabilidade no dame.

Nia hatutan tan: “Todan boot ida iha sira na’in rua nia kabaas no konsiénsia, sira na’in rua hatudu ona dezde tinan tolu liu-ba katak serbisu hamutuk di’ak teb-tebes ne’ebé konsege lori Timor hetan dame no dezenvolvimentu, serbisu hamutuk entre líder na’in rua ne’e tenkiser ba oin nafatin”.


Tuir nia kuandu laiha kolaborasaun entre FRETILIN ho CNRT, Timor sei la moris hakmatek. Nia fiar líder partidu rua sei túr hamutuk hodi haree solusaun saida maka di’ak liu ba Timor.

“Iha tinan sanulu nia laran, Xanana Gusmão halo buat barak (harii infraestrutura oi-oin no lori timoroan atus ba atus ba eskoka iha rai liur), ne’e duni ezije Xanana ativa iha governasaun para kontinua planu balun ne’ebé seidauk ezekuta”, Premiadu Nobel ba Dame haklaken.

Biban ne’e, Xefe Estadu, Lú-Olo hateten hakarak governu foun mai tenke estável no dura to’o tinan lima atu responde povu nia nesesidade. Atu atinje objetivu ne’e, nia dehan, líder istóriku sira no jerasaun foun sira tenke serbisu hamutuk.

Jornalista: Xisto Freitas | Editora: Rita Almeida

Foto: Inkontru entre Prezidenti Repúblika, Dr. Francisco Guterres Lú-Olo ho Premiadu Nobel ba Páz, Dr. José Ramos Horta iha Palásiu Prezidénsia Repúblika, sesta ohin. Imajen Mídia Palásiu PR.

Sem comentários: