Loron 1 Outubru Autoridade Aduaneira Tama Iha Vigór

DILI, (TATOLI) – Diretór Jerál Alfándega, Ministériu Finansa, José António Fátima Abílio hatete Autoridade Aduaneira iha ona lei orgánika foun ne’ebé promulga husi Prezidente Repúblika, nune’e  iha loron 1 fulan-outubru autoridade ne’e tama iha vigór.

“Maibé iha parte ida mós ita tenke iha konsiderasaun tanba agostu nia laran ita sei iha governasaun foun. Governu foun ne’e sei halo orgánika ministériu nian hotu mak foin halo diploma ministeriál ba diresaun sira. Bainhira orgánika ministériu foun ne’e ho Aduaneira mak Governu foun aseita atu laiha alterasaun signifika autoridade bele la’o ona”, José hatete iha  edifísiu tuan Ministériu Finansa nian, ohin.

Maibé bainhhira iha revizaun mak autoridade hamriik bazeia ba desizaun Governu foun nian. “Kuandu iha alterasaun ruma maka, altera tiha mak foin troka fali”.

Sobre instalasaun autoridade ne’e, ekipa téknika Komisaun Reforma Fiskál (KRF) ho Diresaun Jerál Alfándega prepara ona pakote atu aprezenta ba Komisaun Instaladora hafoin fó instrusaun atu avansa ho prosesu pakote ba Autoridade Aduaneira nian.

José hatete autoridade iha orgánika foun, nune’e sei halo prosesu rekrutamentu atu kompleta estrutura no kompleta rekezitu balun ba funsionáriu balun ne’ebé autoridade presiza atu apoiu iha diresaun jerál rua  Alfándega no Impostu ne’ebé daudaun hala’o hela reforma.

“Lei Kódigu Aduaneiru mós foun, aprova no promulga ona depois sei tama iha implementasaun nian, maibé atu tama implementasaun ami tenke halo sosializasaun liuliu ba importadór, ofisiál Alfándega, despaxante, ajénsia no instituisaun relevante sira kona-ba kódigu foun ne’e para sira mós bele hatene funsionamentu kódigu foun ne’e”.

Husi kódigu foun ne’e tenta iha ajustamentu Dekretu Lei lima tau hamutuk ida hodi simplifika para hafasil halo operasaun iha autoridade foun ne’e.

Legalmente Alfándega sei sai hanesan autoridade maibé tanba sei iha governasaun foun ne’ebé mai, nune’e ho orgánika aduaneira nian mak Governu aseita para laiha mudansa signifika bele la’o ona maibé kuandu governu tenke halo revizaun mak hein desizaun husi Governu foun ne’e.

Jornalista: Maria Auxiliadora | Editora: Rita Almeida

Foto: Diretór Jerál Alfándega, Minstériu Finansa, José António Fátima Abílio.

Notísia relasiona iha TATOLI

Alfándega-Impostu Troka ba Autoridade Aduaneira-Tributária