sábado, 29 de julho de 2017

Xina eziji ba nasaun estranjeiru sira atu labele husu kona-ba Nobel Dame nia feen

Governu xinés husu iha loron-sesta ne'e ba komunidade internasional hodi labele tama kahur "iha sira nia asuntu internu sira" bainhira husu kona-ba Liu Xia, viúva hosi Nobel Dame xinés, Liu Xiaobo, ne'ebé maka foin lalais ne'e mate.

Seidauk hatene Liu Xia nia kondisaun dezde loron 15 Jullu bainhira nia marka prezensa iha nia laen nia funeral.

"Ami la konkorda tebes atu nasaun sira seluk tama kahur iha Xina nia asuntu internu sira", hatete hosi porta-vós hosi ministériu Negósiu Estranjeiru nian Lu Kang, bainhira hatán kona-ba Liu nia situasaun.

"La'ós hanesan kestaun diplomátika ida", nia hatutan, relasionadu ho mensajen sira preokupasaun nian ne'ebé haruka hosi governu sira EUA no hosi nasaun oioin hosi Uniaun Europeia nian.


Lu defende mós katak Liu Xia, ho tinan 56, "hanesan sidadaun xineza" no "Governu sei proteje nia direitu lejítimu sira tuir lei".

Viúva, ne'ebé hanesan mós eskritora no hahú iha tinan 2011 hetan prizaun domisiliáriu maski laiha akuzasaun ba krimi ida, nia prezensa ikus sira maka durante nia laen nia funeral no iha ró ne'ebé maka uza hodi lansa Liu Xiaobo nia sinza sira ba tasi.

Jornalista oioin tenta iha loron hirak ikus ne'e vizita Liu Xia nia uma maibé hetan bandu hosi polísia.

Liu Xiaobo mate iha loron 13 Jullu, ho tinan 61, vítima hosi kankru ida, no ho akompañamentu hosi polísia.

Nia hetan kondenasaun iha tinan 2009 no kadeia ba tinan 11 tanba sai hanesan autor ida hosi "Karta 08", dokumentu ida ne'ebé asina hosi ema matenek xinés sira hamutuk na'in atus resin no apela ba reforma demokrátiku sira iha nasaun.

SAPO TL ho Lusa

Sem comentários: