DILI,
(TATOLI) - Prezidente Komisaun Diretiva Nasionál Partidu Congresso da
Reconstrução de Timor (CNRT), Dionísio Soares Babo hateten CNRT sei la husik
governu foun ne’ebé mai monu maske CNRT kontinua pozisaun nu’udar opozisaun.
“Nasaun
ne’e foun ho idade tinan 15, foin iha faze konstrusaun Estadu no frajil hela.
Tan ne’e, CNRT lakohi katak ita nia povu ne’e eleisaun hotu tiha ba kedas
eleisaun ida no eleisaun hotu tiha tenke sofre fila fali tanba de’it forsa sira
iha Parlamentu la konkorda malu. CNRT sei halo detal forma apoiu Governu foun
ne’ebé maka mai atu hala’o nia programa ho di’ak liu-tan no karik iha futuru
maka apoia kooperasaun hanesan partidu, CNRT sei apoia,” Dionísio hato’o asuntu
ne’e ba jornalista sira iha Palásiu Prezidente Nicolau Lobato, Bairru-Pité,
Dili, tersa ne’e, hafoin sorumutu ho Prezidente Repúblika, Dr. Francisco
Guterres Lú Olo.
Nia
informa iha governasaun ida ne’e nian, CNRT respeita ba diskusaun koligasaun
ne’ebé partidu tolu (FRETILIN, PLP no KHUNTO) hala’o hela no sei fó apoiu ba
partidu hirak ne’e nia pozisaun no importante maka iha rezultadu ne’ebé di’ak
atu asegura estabilidade governativa hodi halo dezenvolvimentu ba povu iha
tinan hirak mai oin.
Eis
Sekretáriu Jerál CNRT ne’e afirma CNRT kontinua sai opozisaun tuir rezultadu
konferénsia iha semana hirak liu-ba maibé opozisaun la’ós ho karáter
konfrontativu.
“Opozisaun
katak koopera forma parseria no sei fó apoiu ba prosesu governasaun ne’e tomak.
Pur-ezemplu, diskusaun sira ne’ebé akontese iha Parlamentu, iha kestaun balun
ne’ebé maka karik governu foun presiza atu deskuti, CNRT prontu atu apoia
liu-liu kestaun sira ne’ebé iha relasaun ho soberania, páz no estabilidade,”
nia hatutan.
Sorumutu
ne’ebé hala’o ho Xefi Estadu Lú Olo deskuti kona-ba CNRT nia pozisaun ba
kestaun estabilidade governativa, páz no estabilidade nasionál.
Jornalista:
Xisto Freitas | Editór: Manuel Pinto
Foto:
Ministru Estadu, Koordenadór Asuntu Administrasaun no Justisa (MEKAAJ) no Ministru Administrasaun Estatál
(MAE), Dionísio Babo Soares. Foto/António Gonçalves.
Sem comentários:
Enviar um comentário