Fundu Mina Rai Hela Billaun 16.5

DILI – Relatoriu husi Banku Central Timor Leste (BCTL), total osan husi fundu Mina rai nian hela deit ona billaun 16.5 USD tanba nee presiza desenvolve setor produtivas hodi reforsa kofre estadu.

Kestaun nee fo sai husi Governador Banku Central TL, Abrao de Vasconselos ba Jornalista, Segunda (28/08/2017) iha Ministeriu Agrikultura Comoro.

“Ita nia osan husi fundu mina no gas nian hela deit ona, Billaun 16.5, ida nee hanesan fontes principal atu finansia dezenvolvimentu iha TL, no osan nee sei tun, tanba nee tenke tau atensaun ba iha setor produtivus,” informa Governador Banku Central TL.

Nia hatutan tan katak, agora kria tan ona introdusaun sistema garantia de kreditu, nee hanesan pasu ida ba oin tanba atu promove setor produtivu laos haree deit ba kriasaun empregu. Maibe, atu promove mos kriasaun merkadu iha baze hodi hadia ekonomia rai laran.

Iha parte seluk Peskizador Luta Hamutuk, Juvinal Diaz hateten, tuir dadus neebe maka banku central fo sai katak, osan husi fundu mina no gas nian nee tun ona ba Billaun 16.5. Tinan 10 tan osan nee sei hotu, tan nee hahu agora tenke dezenvolve ona, setor agrikultura, peskas Turismu nomos industria kiik, atu nunee bele fo resetas hodi redus dependensia ba osan mina nia.

“Ita haree governu seidauk tau importansia lolos ba setor produtivu neebe, atu fo resetas ba estadu tanba nee maka tinan-tinan ita foti osan husi fundu mina rai nia ho montante boot hodi, hadia dezenvolvimentu iha rai laran, tan nee too ona tempu atu dezenvle setor produtivus,” sujezere Peskizador nee.

Nunee mos, emprejariu Jose Barreto hateten, tuir istimasaun ema ekonomista sira nian katak tinan 10 tan osan husi fundu mina rai nee sei hotu, liga ba produsau mina bayu undan hahu tun, kampu mina rai Kitan maran ona, no kampu greater sunrise seidauk bele produs tanba, sei hein delineasaun fronteira maritima.

“Ita haree ba folin mina tun sei fo implikasaun ba rendimentu tun makas, karik la deskobre mina rai iha posu ou kampu foun maka, nee sei fo ameasa ba futuru TL nian iha aban bainrua, tan nee governu tenke dezenvolve makas iha setor sira neebe fo rendimentu diak,” informa nia.

Madalena Horta | Suara Timor Lorosae