Seguransa Ba Juiz Importante

DILI - Orgaun justisa iha papel importante hodi garante lia loos, tanba nee akademika sira husu atu tau seguransa ba juiz sira, atu salva sira nia vida.

“Ita nia nasaun, tau mos atensaun ba orgaun justisa sira hodi halo servisu ho diak. Liu liu seguransa ba juiz, ministeriu publiku nomos defensor publiku sira. Tanba sira mak orgaun independente atu bele deside buat neebe loos no sala. Presija mos seguransa atu bele salva sira nia vida,”hateten Finalisa FCS UNTL, Martinho Noronha ba STL iha Kampus Caikoli, Segunda, (28/08/2017).

Nia sublinha, orgaun justisa sira halao servisu ho diak no lori duni kriminozu balu ba hatan iha tribunal too ba hela iha kadeia. Nunee governu foun tenke tau matan nafatin ba sira atu halao servisu ho diak, liu liu garante lia loos.

Ministru justisa foun, apoiu nafatin orgaun justisa atu bele servisu ho independente, liu liu prosesa kazu neebe sei pendente iha tribunal atu bele lao lalais.

Iha fatin seluk Akademika, Manuel Magno hateten, atu tau seguransa ba juiz, nee kompetensia ministru jutisa nian. Maibe nasaun nee sempre iha hakmatek nia laran, tanba nee fiar katak la iha ema ida mak iha hanoin, atu bele halo ameasa ba juiz no orgaun justisa sira.

“Ita nia nasaun nafatin moris iha pas nia laran, hau fiar katak la iha ema ida maka iha hanoin atu bele halo ameasa ba ita nia juiz sira, maske seguransa la tuir juiz sira, maibe ita nia estadu iha seguransa neebe metin. Fiar katak la iha ema ida, mak iha hanoin atu ameasa no book ema seluk, ”esplika Manuel.

Akademika nee relata tan, juiz no orgaun justisa sira mesak Timor oan, tanba nee servisu ho independente atu lori lia loos lao ba oin. Ho sira nia kapasidade no matenek neebe iha, mak bele deside ema neebe sala no ema neebe loos. 

Terezinha De Deus | Suara Timor Lorosae