SP Seidauk Dezenvolve Ekonomia TL

DILI - Setor Privadu (SP)rai laran seidauk bele atu kaer mesak ekonomia TL, tanba sei depende makaas ba setor publiku neebe mak forte tebes.

Kestaun nee fo sai husi Ministru Agrikultura e Peskas, Estanislau da Silva ba Jornalista Segunda (28/08/2017) iha nia knar fatin Salau MAP Comoro.

“Hau hanoin setor privadu rai laran atu kaer mesak ekonomia TL maka, nee seidauk bele tanba, ekonomia tomak nee sei depende makas ba iha setor publiku, no ita nia setor publiku oras nee forte tebes, tan nee setor privadu rai laran nee buka atu partesipa hodi reforsa setor sira nee bele asesu ba kapital,” informa Ministru nee.

Nia mos haktuir tan katak, governu tenke promove setor privadu sira tanba, setor privadu maka fo servisu ba ema, no atu redus numeru dezempregu iha rai laran, maka save principal nee iha setor privadu sira nia liman. Tanba obzektivu prinsipal governu nian maka atu redus numeru dezempregu iha rai laran, no atu redus dezempregu maka tenke halo investimentu atu nunee bele fo servisu ba Timor oan sira.

Hatan ba kesatun nee, Prezidente CCI-TL, Oscar Lima hateten, setor privadu rai laran pronto atu dezenvolve ekonomia rai laran, importante maka governu tenke kria kondisaun atu nunee bele fasilita diak liu tan atividade setor privdu sira.

“Ami pronto atu dezenvolve ekonomia TL, importante maka governu tenke kria kondisaun liu-liu garante kreditu ba setor privadu rai laran atu nunee, bele halo kompetisaun ho ema rai liu sira neebe mai investe ona iha TL,” informa nia.

Nunee mos Vice Prezidente CCI-TL, Rui Castro hateten, setor privadu sei hasoru hela problema rekursu umanus nomos finanseru, tan nee seidauk bele atu hamrik mesak tan nee ami presiza nafatin tulun husi ita nia governu. 

Madalena Horta | Suara Timor Lorosae