Prezidente
Estadus Unidus nian, Donald Trump, afirma iha loron-tersa ne'e katak
"opsaun sira hotu iha meza leten" hafoin Koreia-Norte dispara misil
balístiku ida ne'ebé semo iha teritóriu Japaun nian.
Iha
deklarasaun eskritu, xefe Estadu norte-amerikanu hatete katak "asaun
ameasador sira no dezestabilizador sira" aumenta de'it izolamentu hosi
rejimi Pyongyang nian iha rejiaun no iha mundu tomak.
Trump
hatutan ona katak asaun sira hosi Koreia-Norte hatudu "desprezu ba
[nasaun] viziñu sira" no katak "hanoin hela opsaun sira"
relasionadu ho resposta norte-amerikanu nian hasoru manobra sira hosi rejimi
ne'ebé Kim Jong-Un lidera.
Koreia-Norte
dispara ona iha loron-tersa ne'e misil balístiku ida ne'ebé semo iha Japaun
antes monu iha oseanu Pasífiku.
Konsellu
Seguransa ONU sei halo enkontru urjente tanba pedidu hosi Washington no Tókio,
no primeiru-ministru japunés, Shinzo Abe, bolu atensaun ba "ameasa todan
ida no ne'ebé maka nunka akontese".
Iha
loron-sábadu, Koreia-Norte dispara ona misil tolu ho alkanse badak iha tasi
Japaun nian, bainhira soldadu norte-amerikanu rihun resin no hosi viziñu
Koreia-Súl partisipa hela iha manobra sira, iha ámbitu hosi ezersísiu anual
militar sira nian iha Península Koreanu.
Lansamentu
sira ne'e akontese iha kontestu hosi tensaun sira ne'ebé aumenta entre
Washington ho Pyongyang.
Iha
inísiu fulan-Agostu, bainhira aumenta tensaun ho Koreia-Norte, Trump ameasa ona
rejimi norte-koreanu ho "ahi no hirus maka'as", no deklara mós katak
opsaun militar hanesan prontu hodi bele asionadu.
Iha
tempu hanesan, líder norte-amerikanu mós hatete katak arsenal nuklear Estadus
Unidus nian hanesan "ida ne'ebé iha liu kbiit no forte tebes".
SAPO
TL ho Lusa
Sem comentários:
Enviar um comentário