domingo, 15 de julho de 2018

Ha’u vota saugati de’it ba líder sira-nia arogánsia

Hosi: Hercus Pereira dos Santos * | opiniaun

Ita hotu hatene katak demokrasia signifika katak povu maka iha kbiit. Podér ne’e iha povu nia liman. Hosi polítiku-na’in, akadémiku no povu baibain hatene signifikadu hosi demokrasia no kuaze ita hotu sempre rona loron-loron.

Agora ita husu povu iha duni podér ka lae? Ita hotu sei hatan katak sim tanba povu maka vota lori hili Prezidente Repúblika, povu maka vota lori hili reprezentante povu nian iha Parlamentu Nasionál no hosi eleisaun lejizlativa lori forma governu. Katak governu ne’e órgaun soberania ida-nebe povu la vota direitamente (atu hanesan uitoan ho órgaun soberania ida seluk maka Tribunál) iha sistema semi-prezidensiál hanesan iha Timor-Leste. Podér povu nian delega hela ba órgaun soberania sira (mezmu Tribunál rasik moos halo ninia knaar em nome do povo) atu lori hala’o dezenvolvimentu ba povu sira-nia moris di’ak. Ita espera katak moris di’ak iha-ne’e la haree de’it ba parte material (esensiál tebes) de’it maibé moos parte seluk-seluk hanesan justisa, kultura, relijiaun, moral tanba iha impaktu importante tebes moos ba dezenvolvimentu Estadu Timor-Leste nian. Katak povu la fó votu gratis! Povu fó votu tanba iha konfiansa ba partidu ou koligasaun partidu sira. Konfiansa ba saída ? Konfiansa atu partidu ou koligasaun sira lori halo programa no implementa programa ba povu nia moris diak. Ne’e katak funsiona buat ida bolu give and take.

Bainhira povu fó ona votu ba partidu mais votadu ou koligasaun partidu sira maka sai ona mais votadu povu ninia intervensaun, infelizmente iha  polítika Timor-Leste nian ba momentu agora, hotu ona. Povu la bele ona intervén tan. Polítiku-na’in sira ou líder hosi partidu polítiku mais votadu ou koligasaun partidu sira mais votadu maka iha ona direitu atu lori forma governu, halo programa no implementa programa ne'ebé tuir loloos, tenke tuir saída maka sira promete iha eleisaun nia laran.

Tanbasá maka to’o agora formasaun governu seidauk kompletu ? Ita hotu akompaña hela situasaun ida-ne’e. Tuir perspetiva hosi Sua Exselénsia Prezidente Repúblika hanoin katak iha naran balu iha lista ba formasaun Oitavu Governu Konstitusionál iha indikasaun ‘problema’ hasoru hela prosesu justisa no karik problema seluk tuir Prezidente Repúblika ninia perspetiva. Hosi ne’e iha povu nia leet iha maluk balu kestiona tanbasá maka Prezidente Repúblika foin maka trava hela naran sira-ne’e enkuantu iha formasaun Sétimu Governu Konstitusionál lae ? Maluk balu, ha’u rona, dehan Prezidente Repúblika la justu. Iha maluk balu fali moos dehan saída maka Prezidente Repúblika halo di’ak. Se ita la hahú halo formasaun governu hosi ministru sira-ne'ebé ‘moos’ la hasoru hela kazu ruma iha justisa (ita moos tenke nafatin respeitu prinsípiu presuncao da inocencia) ne’e hanesan etapa di’ak ida. Se ita la hahú agora bainhira fali ?  Iha maluk balu, ne’e inklui moos deputadu, kestiona atu respeita presuncao da inocencia. Ne’e moos loos iha Estadu Direitu nia laran.

Ho nune’e bainhira ita akompaña maluk sira-ne’e sira-nia ko’alia hotu-hotu loos. Oinsá maka iha kestaun ida hotu-hotu loos. Tanba idak-idak uza sasukat (ángulo) ne'ebé maka loos lori halo análize ba lista kandidatu membru Oitavu Governu Konstitusionál. Ita husu tanbasá uluk Prezidente Repúblika la halo hanesan ne’e ? Ita moos bele husu tanbasá maka la bele Prezidente Repúblika hahú halo hanesan ne’e ?  Ita moos husu tanbasá la respeita presuncao da inocencia ? Ita moos bele husu Prezidente Repúblika la respeitu duni presuncao da inocencia ? Ita moos bele husu liután tanbasá la hatama lai ba lista kandidatu ba membru Oitavu Governu Konstitusionál atu nune’e prosesu justisa la iha impedimentu ho buat ida naran imunidade ? Saída maka ha’u atu dehan iha-ne’e la’ós ona nu’udar akadémiku ida mas liu-liu nu’udar sidadaun oan ida-ne'ebé presiza dezenvolvimentu la’o atu bele fasilita moris loron-loron nian no harii estadu ida-ne'ebé forte ba oin . Ha’u-nia hakerek ne’e la pro no moos la kontra mas fó-hanoin de’it atu oinsá ukun-na’in sira la bele haterus povu nia moris tanba iha Timor-Leste iha tempu ida agora ne’e hotu-hotu, hahu hosi povu ai-leba, labarik, joven, katuas-ferik, dezempregadu (tau hela esperansa atu governu loke kampu serbisu), funsionáriu no emprezáriu, sira-nia moris depende forte tebes ba orsamentu jerál estadu nian. Se orsamentu jerál estadu la aprova tanba falta formasaun governu povu ki’ik maka sei terus no afeita boot tebes ba prosesu dezenvolvimentu iha moris Estadu nian.

Ita hotu hatene katak problema iha formasaun Oitavu Governu Konstitusionál la’ós ona iha kestauan lejitimidade (tanba povu fó ona votu) ou legalidade (tanba tuir ona rekezitu formasaun governu tuir ita-nia Konstituisaun haruka) mas tuir ha’u-nia haree iha boa vontade no sinseridade lider polítiku-na’in sira no bele kait uitoan moos iha arogánsia, ida lakohi lakon ba ida. Tanba nu’udar estadu ida foin sai hosi funu naruk nia laran (tempu portugés, tempu japonés, tempu indonezia) ita seidauk toman ho demokrasia. Ita uza demokrasia hanesan retórika (garganta de’it) de’it lori atinje sira-nia objetivu ukun nian. Baibain politiku-na’in sira ne'ebé nu’udar moos lider rezisténsia la toman demokrasia tanba iha vida militár sira toman fó orden, Nu’udar komandante, soldadu ida la brani atu kritika sira. Hau moos aseita ho Maun-Boot balu dehan militár la iha demokrasia. Ne’e tebes. Tanba militár bainhira iha demokrasia estraga  militár. Tanba militár harii ho objetivu prinsipál ne’e ba funu no se iha funu maka komandante ho soldadu halo enkontru fali lori konkorda malu tiha lae maka ba funu ne’e la bele ! Bainhira maka bele hetan akordu ida no molok hetan akordu ida inimigu atake tiha ona. Buat ne'ebé funsiona iha militár maka ordem da hirarquia. Leten hatun orden ba okos. Karatér militár nian la hanesan ho sivíl nian. Ho mentalidade ida hanesan ne’e maka baibain líder sira hosi nasaun post-konflitu, hosi parte ida ,la toman ema krítika no iha parte seluk, entre líder rezisténsia sira sura ‘kolen’ ba malu. Líder rezisténsia nasionál to’o lokál sinte an katak sira maka merese ukun tanba sira maka terus liu. Iha nasionál lider rezisténsia nasionál sura malu ‘kolen’ lori buka ukun iha órgaun soberania sira hanesan ezemplu ita bele haree momoos iha kampaña  eleisaun antesipada ida-ne’e. Hotu-hotu sura malu kolen. Ke’e sai malu, hatun malu. Idak-idak sinte an terus liu no kontribui makas liu ida seluk durante rezisténsia.

Ita bele haree katak iha ‘gap’ entre buat ida naran fundadór Fretilin no fundadór Estadu Republika Demokrátika Timor-Leste ho kontinuadór. Ita haree parte fundadór sinte an superiór liu tanba sira sinte katak sira maka funda Fretilin no estadu RDTL maibé moos ita haree líder nasionál sira- ne'ebé nu’udar kontinuadór sinte an katak sira maka terus liu tanba sira halo funu iha rai-laran, sae foho tun foho, subar hosi fatin ida ba fatin seluk, tiru malu hasoru bazooka, morteiru no kilat musan nia leten, hakat liu maluk sira-ne'ebé mate iha sira-nia oin, sorin no kotuk, hela mizerável tebes iha ai-laran, hamlaha to’o ba na’ok populasaun sira-nia batar no ai-han ruma iha to’os. Iha rai laran sinte an terus liu parte fundadór sira mas tanba iha rai laran hanoin katak  sira fundadór hela iha rai liur moris di’ak. Mas hosi parte fundadór sinte an katak sira maka funda Fretilin no Estadu RDTL. Hotu-hotu sinte an iha direitu liu ida seluk. Mas realidade ida-ne’e bainhira ita haree di’ak-di’ak la’ós de’it akontese ba líder rezisténsia nasionál sira. Akontese moos iha baze iha ambitu diferente. Iha nasionál líder rezisténsia nasionál sura malu kolen lori buka ukun iha órgaun sobernia no iha baze moos Maun-Boot rezisténsia lokál sira moos sura malu kolen lori hadau malu projetu. Ne’e maka ita-nia realidade. Iha baze hadau malu projetu lori buka moris no iha nasionál buka hadau malu ukun  órgaun soberania ba saída? Semoga ba povu nia moris di’ak!

Ita hotu hatene órgaun soberania sira hanesan Prezidénsia Repúblika, Parlamentu Nasionál no Governu iha interdependénsia ba malu. Prezidente Repúblika atu impoen nia hakarak de’it, iha kestaun balu, ba Parlamentu Nasionál moos la bele. Mezmu atu hala’o funsaun estadu nian moos, iha kazu balu hanesan vizita ba rai liur, Prezidente Repúblika la iha kbiit atu impoen ba Parlamentu Nasionál. Se Parlamentu Nasionál ‘la autoriza’ la vota a favor atu Prezidente Repúblika halo vizita estadu ba rai liur (hanesan foin daudaun akontese Parlamentu Nasionál la husik Prezidente  Repúblika ba vizita estadu ba Portugál), Prezidente Repúblika la bele halo tan buat ida. Prezidente Repúblika atu gosta ou la gosta Prezidente  Repúblika obrigatoriamente submete ba ‘desizaun’ hosi Parlamentu Nasionál. Prezidente Repúblika bele argumenta katak vizita ba Portugál ne’e ba interese nasionál. Deputadu balu moos dehan katak Portugál moos sei kompreende situasaun polítika rai laran.

Mas keta haluhan iha formasaun Governu nian (diferente ho veta Prezidente Repúblika nian ba lei hosi Parlamentu Nasionál, Prezidente Repúblika ninia kbiit ladun forte. Tanba mezmu Prezidente Repúblika veta lei ida hosi Parlamentu Nasionál lori haruka fila ba Parlamentu Nasionál no se Parlamentu  Nasionál lakohi halo tuir Prezidente Repúblika nia hakarak no la hasai nein vírgula ida haruka hikas ba Prezidente Repúblika promulga entaun Prezidente Repúblika obrigatoriamente tenke promulga ona. Prezidente Repúblika espertu uitoan entaun ninia suspende hela la halo promulgasaun) Prezidente Republika moos nu’udar garante regular funsionamentu instituisaun demokrátika (artigu 74 hosi ita-nia Konstituisaun), ‘bele’ halo buat ne'ebé nesesáriu tuir Prezidente ninia entedimentu, lori garante funsionamentu instituisaun demokrátika. Artigu ida-ne’e iha ninia interpretasaun ampla tebes. Iha maluk balu husu artigu ida-ne'ebé hosi ita-nia Konstituisaun maka fó dalan atu Prezidente  Repúblika bele atua hanesan ne’e (Prezidente Repúblika suspende hela lista kandidatu balu ba tomada da posse iha formasaun Oitavu Governu Konstitusionál tanba Prezidente Republika lakohi fó tomada da posse mas husu atu haree fila fali). Tebes maluk sira-nia hanoin hanesan ne’e iha razaun bainhira sira buka artigu ruma iha ita-nia Konstituisaun laran sita esplisitamente kona-ba atu Prezidente Repúblika lori halo ‘kontrolu’ ba kandidatu ba membru iha formasaun governu ida la iha. Ita hotu moos konkorda katak hili membru governu iha formasaun governu ida-ne’e kompeténsia eskluziva Primeiru-Ministru nian tuir artigu 106 númeru 2 hosi ita-nia Konstituisaun. Sôke ita hotu moos la bele haluhan artigu 74 hosi ita-nia Konstituisaun ne’e fo tasitamente ‘poder’, ‘razaun’ ou baze legál-konstituisionál ba atu Prezidente Repúblika nian ne’e.  Em nome do regular funcionamento das instituicoes democraticas Prezidente Repúblika bele halo atu sira hanesan Prezidente Repúblika halo daudaun iha kestaun lori pending hela lista kandidatu sira ba formasaun Oitavu Governu Konstitusionál. Ita moos keta haluhan katak ho baze legál hosi artigu 74 moos maka Prezidente Repúblika disolve Parlamentu Nasionál lori hamosu eleisaun antesipada  ne'ebé ita foin liu daudaun ne’e.

Ho nune’e se ita uza sentimentu arogánsia ba malu lori ‘sadik’ malu ita hotu la manan buat ida no ita hotu lakon. Sei hamosu tan de’it konfuzaun iha senariu politiku formasaun governu iha Istoria Timor-Leste nian. Tanba ha’u hanoin Prezidente Repúblika iha pozisaun forte no Aliansa Maioria Parlamentár iha pozisaun fraku. Aliansa Maioria Parlamentár la iha bargaining position. Se Aliansa Maioria Parlamentár la konsege kovense Prezidente Repúblika ba formasaun Oitavu Governu Konstitusionál ita iha posibilidade atu hakat fali ba eleisaun antesipada dala ida tan. Agora ita husu tok ba malu, ho haraik an tomak, se maka bele obriga Prezidente Repúblika fó pose ba membru governu seluk-seluk ? Ita bele iha hanoin oioin ho razaun oioin no teoria oioin. Mas ha’u bele dehan katak la iha ema ida no la iha mekanizmu ida maka bele ‘obriga’ Prezidente Repúblika fó pose ba membru governu pendente hela ne’e.  Dalan ikus liu bainhira ida lakohi lakon ba ida (Prezidente Repúblika ho Aliansa Maioria Parlamentár) maka eleisaun antesipada dala ida tan. Gasta osan povu nian, gasta tempu povu nian, difikulta povu nia moris tanba de’it politiku sira-nia arogánsia. Ha’u apenas hakerek lori fó-hanoin de’it no lori halo ita hotu-hotu hanoin took ba. Ha’u la bele obriga Prezidente Repúblika fó pose ba membru governu seluk. Ita-Boot lee-na’in sira moos hanesan ho ha’u la bele obriga Prezidente Repúblika. Polítiku-na’in sira moos la bele. Maun-Boot sivíl no militár moos la bele. Ita hotu-hotu la bele. Se nune’e iha solusaun ka lae  atu ita lalika kole an tan ba eleisaun antesipada?

Solusaun ba problema formasaun Oitavu Governu Konstitusionál maka boa vontade no sinseridade ba malu. Iha boa vontade no sinseridade mosu iha espiritu simplisidade nia leten. Polítiku-na’in sira tenke, ba povu nia di’ak, buka hanoin di’ak-di’ak took saída maka sira hakarak hosi formasaun Oitavu Governu Konstitusionál ? Hanesan Sua Exelénsia Primeiru Ministru Taur Matan Ruak dalaruma hatene lori husu ita hakarak sivilizasaun saída maka ita hakarak harii iha Timor-Leste ? Pergunta ne’e kle’an tebes-tebes se sidadaun hotu-hotu (inklui polítiku-na’in sira) tau iha konsiderasaun ba atu polítiku ruma. Ita hahii povu ninia maturidade lori partisipa iha festa demokrasia ida-ne’e (eleisaun antesipada foin daudaun ne’e) tanba taxa partisipasaun povu nian sa’e (ne’e moos tanba governante kompetente ninia serbisu maka’as moos no ita presiza louva no fó konsiderasaun) ne'ebé hatudu povu ninia interese lori kontribui harii governu ida-ne'ebé bele garante dezenvolvimentu no boa governacao. Povu sivilizadu ona tanba mezmu hasoru obstákulu oioin bele hala’o votasaun iha eleisaun antesipada ho susesu. Povu ne’e ha’u haree iha ona maturidade lakohi tan monu ba lasu hanesan krize sira uluk-uluk (Ha’u haree iha polítiku-na’in balu halo hela polítika devide et imperat. Katak hafahe lori ukun. Iha tempu sira uluk hafahe tiha Loromonu-Lorosa’e. Ho nune’e votus ba partidu balu hetan maka’as tanba hosi parte Loromonu nian. Foin daudaun ne’e hamosu tan rai laran no rai liur-diaspora tanba rai laran ema barak liu lori hetan simpatia barak liu. Mas ha’u bele dehan haree hosi partidu polítiku Fretilin ninia votos entaun Fretilin manan. Fretilin la ukun mas Fretilin la lakon iha eleisaun antesipada. Ha’u bele dehan Fretilin lakon iha estratejia no karatér hosi lideransa ladun kontribui. Fretilin lakon tanba de’it iha koligasaun Aliansa Mudansa ba Progresu (se partidu tolu ne’e konkorre mesak entaun Fretilin sai partidu mais votadu) konkorre ba eleisaun lori manan mezmu nune’e votos Aliansa Mudansa ba Progresu nian tuun tanba lakon kadeira ida. Aliansa Mudansa ba Progresu manan tanba estratejia di’ak no hatene hamaus povu tanba povu Timor-Leste la presiza lojika mas presiza valorizasaun, hamaus no hameak hanesan Maun-Boot balu halo. Hatene dada simpatia povu nian. Hatene hola povu nia laran. Atu hanesan uitoan karik uitoan de’it ho Maquiavel hanorin katak iha parte ida maka tenke hatene hamaus povu nia laran) mas agora ita husu oinsá ho politiku-na’in sira ? Politiku-na’in sira moos sivilizadu ona ? Ita moos bele repete pergunta hanesan hosi Sua  Exelénsia Taur Matan Ruak nian lori husu sivilizasaun saída maka Oitavu Governu Konstituisonál ne’e hakarak harii ? Ita hotu espera katak boa governacao di’ak ida lori halo dezenvolvimentu, iha setór hotu, ba povu nia moris di’ak.

Solusaun posível ida seluk maka Aliansa Maioria Parlamentar bele halo moos maka halo tuir lai Prezidente Republika ninia hakarak atu lori asegura Oitavu Governu Konstitusionál la’o ba oin (aprova orsamentu jerál estadu) ona no depois maka halo hikas fali remodelasaun iha tempu oportunu.

Buat ne’ebé ha’u hakarak realsa iha-ne’e maka ita presiza tau iha hanoin hela moos katak iha tempu kampaña, polítiku-na’in sira halo kampaña(iha eleisaun ba Prezidente Repúblika no iha elesaun lejizlativa) hakilar iha Timor-Leste laran tomak lori husu povu vota ba sira tanba sira maka sei tane povu nia interese ba moris di’ak. Prezidente Repúblika hakarak povu nia moris di’ak. Polítiku-na’in sira hosi Aliansa Maioria Parlamentár moos hakarak povu nia moris di’ak. Agora parte rua ne’e idak-idak husu tok ba an sira-nia hahalok (ida la rende ba ida) kontribui ba povu nia moris di’ak ? Idak-idak moos husu ba an rasik sira-nia pozisaun hanesan ne’e kontribui ba povu nia moris di’ak? Agora ita (jerasaun foun) hotu husu sa sivilizasaun maka polítiku-na’in sira (jerasaun tuan sira) hakarak husik hela ba ita jerasaun foun sira ?  Ita atu banati tuir ida-ne'ebé? Banati tuir Prezidente  Repúblika ou banati tuir Aliansa Maioria Parlamentár? Ou sira hotu iha interese ‘terselubung’ lori halo povu maka sai vitima ? Se nune’e ha’u, nu’udar sidadaun ida, vota saugati de’it ba líder sira-nia arogánsia.

Antigo aluno do Mestrado dos Direitos Humanos da Escola de Direito da Universidade do Minho. Dalaruma ha’u-nia hakerek balu kritiku uitoan lori kestiona no la monu karik ba maluk balu nia laran no se iha maluk balu hakarak fó sala mai ha’u entaun karik di’ak liu fó sala ba Amu-Lulik sira (liu-liu jesuita sira) maka forma ha’u sai krítiku nune’e no hanorin defende Jesus Cristo doutrina. Ha’u halo tanba ha’u-nia mestre sira hanorin ha’u halo nune’e. Ha’u la pro no la kontra kualkér partidu polítiku ida ou kualkér polítiku ida. Ha’u-nia ko’alia ba loos mai loos. Uluk sei eskola iha Santo Yoseph kelas tiga hau coret Sandra Lay ninia foto entaun Romo Edu, SJ hirus tebes haruka kelas satu to’o kelas tiga sai ba kampu lori husu se maka coret Sandra Lay ninia foto. Amu Edu : ‘Ini pasti bukan anak kelas tiga.’ Siapa yang coret foto Sandra Lay ? Ha’u langsung foti liman. Simu ho brani no haraik an tomak katak ha’u. Estudante hotu angkatan 1997-2000 hatene. Kecuali hirak la tama eskola iha loron ne’ebá. Ita la bele tauk ko’alia lia-loos mezmu lia-loos ne’e lori ba mate.  Lia-loos la bele rona no fiar de’it. Lia-loos tenke cek no koko duni loos ou la loos. La bele rona de’it fiar ona.Iha fiar labele hanesan Tome mas iha kazu moris ruma ita presiza hanesan Tome kaer tiha ho liman no haree rasik ho matan maka bele fiar loos ou la loos no di’akliu no dalan loos liu maka iha Tribunal atu la kria tan konfuzaun no violasaun ba lei seluk-seluk. Lia-loos tenke hetan ho dalan loos. Ema balu loos tiha, hanesan ha’u lee iha jornal sira kazu kona-ba selingkuh, maibé tanba emosaun la kontrola halo fali violénsia (baku no oho) kontra lei. Iha fiar de’it maka la bele hanesan Tome tanba hanesan Jesus dehan rahun di’ak ba sira hirak la haree mas fiar. Katak fiar ba Jesus Cristo nia moris hias. 

*Antigo estudante da Escola de Direito da Universidade do Minho do Mestrado em Direitos Humanos. Bele kontaktu iha otadian@gmail.com ou iha númeru kontatu: 76094252

Sem comentários: