TL-Austrália Asina Tan Nota Entendimentu Ba Programa Seasonal Workers

DILI, (TATOLI) – Governu Timor-Leste (TL), liuhosi Sekretáriu Estadu Polítika Formasaun Professional no Empregu, Julião da Silva, akompaña husi Ministru Negósiu Estranjeiru no Kooperasaun, Dionísio Babo, No reprezentante husi Governu Austrália, Embaixadór Peter Roberts, asina tan nota entendimentu ida konaba Programa Seasonal Worker.

“Programa ne’e benefísiu di’ak los ba joven Timor-Leste hodi redús númeru dezempregu. Alende ne’e, Programa Seasonal Workers bele muda joven sira nia mentalidade, oinsá atu preokupa ho sira nia futuru”, Tenik Julião iha ninia diskursu, iha edifísiu MNEK.

Hodi informa, programa ne’e hahú iha tinan 2012 ho ema na’in 12 no to’o agora iha 2.818. Enkuantu númeru traballadór ativu no sei servisu iha Austrália hamutuk 1.033, ho total rendimentu husi tinan 2012 to’o 2018 hamutuk millaun $10.

“Governu kontinua esforsu an ho meius no mekanizmu hotu, hodi koopera ho Governu Austrália, nune’e bele prienxe kuota ba futuru”, katak.

Nia dehan tan, “Iha programa ida ne’e, timoroan sira ne’ebé ba servisu fulan neen mak foin fila, sira kontinua atividade ne’e iha rai laran no balun susesu ho sira nia negósiu”.

Governante ne’e rekoñese, mezmu dala ruma enfrenta preokupasaun barak, maibé hahú kompromisu ho VIII Governu liuhosi Sekretaria Estadu Polítika Formasaun Professional no Empregu (SEPFOPE), koko atu lori prosesu sira ne’e ho di’ak.

Fatin hanesan, Embaixadór Austrália iha Timor-Leste, Peter Roberts sente kontente ho traballadór sira tanba bele fó benefísiu di’ak ba  nasaun no família.

“Ha’u orgullu tebes, hare traballadór sira sai husi Timor ho entuziazmu, fila fali lori esperiénsia foun no hetan osan hodi apoiu sira nia família”, tenik.

Jornalista: Julia Chatarina | Editór: Manuel Pinto

Imajen: Governu Timor-Leste (TL), liuhosi Sekretáriu Estadu Polítika Formasaun Profesionál no Empregu, Julião da Silva, akompaña husi Ministru Negósiu Estranjeiru no Kooperasaun, Dionísio Babo, no reprezentante husi Governu Austrália, Embaixadór Peter Roberts, asina tan nota atendimentu ida kona-ba Programa Seasonal Worker, iha Praia dos Coqueros, ohin.