Angola ho Guiné-Bissau hanesan nasaun luzófonu úniku ho dezempeñu demokrátiku ki'ik hosi média rejional

Angola ho Guiné-Bissau hanesan nasaun úniku entre nasaun luzófonu neen referensiadu iha relatóriu internasional ida ho dezempeñu ki'ik liu hosi média iha rejiaun ne'ebé maka sira halo parte, hakerek iha dokumentu hosi IDEA International.

Relatóriu kona-ba Estadu Global hosi Demokrasia (GSoD) elabora hosi International IDEA, instituisaun ida ho sede iha Estokolmo, no analiza nasaun hamutuk 155 iha mundu tomak, maibé la aprezenta iha informasaun nasaun tolu luzófonu - Cabo Verde, Guiné Ekuatorial ho São Tomé & Prínsipe.

Análiza hosi IDEA halo ho baze hosi kritériu prinsipal lima - Governu reprezentativu, direitu fundamental sira, fiskalizasaun Governu nian, imparsialidade iha administrasaun no empeñu iha partisipasaun (kritériu ikus ne'e laiha informasaun hosi nasaun luzófonu ida) -, ne'ebé fahe iha tema 16, ho total indikador hamutuk 98.

Governu reprezentativu fahe fali iha eleisaun livre sira, votasaun inkluzivu, liberdade ba partidu polítiku sira no governu eleitu sira, direitu fundamental sira iha asesu ba justisa, liberdade sivil sira, direitu sosial sira ho ekuidade, fiskalizasaun iha Governu iha Parlamentu ho efetividade, independénsia judisial, integridade hosi "media", imparsialidade iha administrasaun iha auzénsia hosi korupsaun no ezekusaun previzível no empeñu iha partisipasaun hosi sosiedade sivil, partisipasaun eleitoral, demokrasia diretu ba eleisaun rejional ka munisipal sira.

Avaliasaun ne'ebé hetan iha relatóriu analiza informasaun dezde tinan 1975 to'io tinan 2015 no pontuasaun ikus varia entre 0, ne'ebé reprezenta evolusaun ki'ik liu, no 1, ida ne'ebé aas liu.

Entre nasaun luzófonu sira, Angola ho Guiné-Bissau hanesan nasaun úniku sira ne'ebé situa ki'ik liu hosi média sub-rejional ne'ebé maka inklui iha rejiaun (Áfrika Austral ho Áfrika Osidental), maski estadu demokrasia angolanu hanesan úniku ho kritériu sira ne'ebé maka ki'ik liu hosi média, bainhira guiniense sira aprezenta nível aas rua ka nível rua ki'ik.

Portugal (Europa), Brazil (Amérika-Súl), Timor-Leste (Ázia) ho Mosambike (Áfrika Austral) hanesan, tuir orden, nasaun luzófonu sira seluk ne'ebé maka rejista valor aas liu média rejional, maski demokrasia mosambikanu rejista kritériu ida, hosi fiskalizasaun ba Governu, ne'ebé hanesan ho média sub-rejional.

Iha Áfrika Austral, ne'ebé maka halo parte hosi Angola ho Mosambike, média rejional iha parámetru haat ne'ebé maka nasaun sira avalia situa iha pontu 0,50 iha parte ne'ebé referente ba Governu reprezentativu, 0,51 iha direitu fundamental sira, 0,49 iha fiskalizasaun ba Governu no 0,40 iha imparsialidade iha administrasaun nian.

Angola rejista pontu média sira 0,47, 0,43, 0,37 ho 0,28 no Mosambike, tuir orden hanesan, rejista pontu médiu 0,56, 0,55, 0,49 ho 0,44.

Iha Áfrika Osidental, reprezenta hosi Guiné-Bissau entre Estadu luzófonu sira, demokrasia guiniense iha indikador sira aas liu média (pontu 0,62 iha kritériu hosi Governu reprezentativu - iha média rejional maka pontu 0,5 -, no 0,53 iha fiskalizasaun ba Governu - iha média rejional maka 0,49), no sira seluk ki'ik (pontu 0,46 iha direitu fundamental sira - média rejional hosi maka 0,51 -, no 0,31 iha imparsialidade hosi admnitrasaun - média rejional maka pontu 0,40).

Timor-Leste, "reprezentante" luzófonu iha Ázia, iha parámetru tomak aas liu média rejional - Governu reprezentativu (pontu 0,67/média rejional maka 0,50), direitu fundamental (pontu 0,56/0,53), fiskalizasaun hosi Governu (pontu 0,58/0,48) no imparsialidade iha administrasaun (pontu 0,49/0,44).

Brazil, luzófonu iha Amérika-Súl rejista mós kritériu pozitivu sira: Governu reprezentativu (0,80/média rejional maka pontu 0,68), direitu fundamental (pontu 0,66/0,60), fiskalizasaun ba Governu (pontu 0,72/0,55) ho imparsialidade iha administrasaun (pontu 0,59/0,50).

Iha Europa, Portugal hetan rezultadu di'ak liu entre nasaun luzófonu sira: Governu reprezentativu (0,81/média rejional maka pontu 0,71), direitu fundamental (pontu 0,81/0,74), fiskalizasaun ba Governu (pontu 0,74/0,66) ho imparsialidade iha administrasaun (pontu 0,72/0,64).

Média di'ak liu iha nível mundial la hanesan entre pontu 0,85 no 0,94 ne'ebé hetan hosi nasaun sira hanesan Fransa, Kosta Rika, Dinamarka, Reinu Unidu, Suésia, Finlándia, Alemaña, Holanda ho Kanadá, no sira ne'ebé aat liu (entre pontu 0 ho 0,20) maka hetan iha Koreia-Norte, Xina, Líbia, Sudaun-Súl, Laos ho Arábia Saudita, no seluk tan.

SAPO TL ho Lusa