Ministra Edukasaun timoroan nian
hatete iha loron-segunda ne'e katak nia hein atu konklui iha fulan ne'e nian
laran sosa viajen profesor portuguéz sira envolvidu iha projetu eskola
referénsia sira iha Timor-Leste, ne'ebé maka hein tiha ona iha semana barak
nian laran hodi bele halo viajen ba Dili.
"Ami iha prosesu
aprovizionamentu viajen profesor sira nian. Ami hein katak durante fulan
Fevereiru ne'e profesor sira bele desloka ona ba Timor-Leste", hatete
Dulce Soares, ministra Edukasaun Juventude no Desportu timoroan nian ba Lusa.
"Maski situasaun iha
Timor-Leste ne'e, ami esforsa hodi rezolve situasaun ne'e hodi bele mai sedu
liu. Ami koopera hela ho embaixada portugueza iha asuntu ne'e", nia
refere.
Fonte kooperasaun portugueza nian
konfirma ba Lusa katak, hafoin tinan barak tutuir malu ba atrazu sira hosi
parte Portugal nian, iha preparasaun no asinatura ba kontratu profesor sira
nian, kumpri kalendariu ba tinan ne'e nian.
Profesor sira ne'e iha kontratu
no simu salariu, iha semana barak nian laran ona, iha Portugal, hein hela simu
billete aviaun nian - ne'ebé maka iha ámbitu projetu nian ne'e hosi
responsabilidade Timor-Leste nian maka selu salariu kompletu iha teritoriu
timoroan.
Maski anu letivu iha Sentru
Aprendijazem no Formasaun Eskolar (CAFE) nian komesa tiha ona iha meadu fulan
Janeiru, profesor portuguéz na'in 130 seidauk iha nasaun ne'e, ne'ebé maka sei
destaka ba eskola 13 iha Timor-Leste.
Dulce Soares la klarifika motivu
ba atrazu sosa viajen sira ne'e.
Governante ne'e koalia ba Lusa
iha aprezentasaun ba sestu numeru revista Tempu nian iha Dili, unika
publikasaun totalmente ho lian portugueza iha Timor-Leste, editada hosi Eskola
Portugueza Dili.
Numeru 6 publikasaun nian, ne'ebé
maka konta ho finansiamentu Uniaun Europeia nian, ne'e espesial ho konta no
kontributu CAFE sira hotu nian iha Timor-Leste.
Iha ámbitu seluk, governante ne'e
klarifika katak koordenadora timoroan ba projetu ne'e, Antonieta de Jesus, la
halo parte iha grupu funsionariu kazual na'in 273 ne'ebé maka sira nian
kontratu Ministeriu Edukasaun, Juventude no Desportu la renova iha final tinan
2018.
"Despaxu ne'e klaru: la
abranje asuntu bilateral sira. Ida ne'e má interpretasaun hosi señora
Antonieta", nia hatete, no afirma katak la afeta elementu sira ne'ebé
ligadu ho projetu kooperasaun bilateral ho Portugal - eskola CAFE no projetu
Formar Mais - ho Nova Zelandia (iha projetu pré-eskolar nian) no ho Governu
australianu iha ensinu báziku.
"Kestaun ne'e, se iha
duvida, lolos tenki koalia iha Ministeriu. Nia koordenadora parte timoroan sira
nia. Ne'e la justu koalia ida ne'e iha publiku tanba ami esforsa hela iha
kestaun ne'e", nia hatete.
Dulce Soares hatete katak too
momentu ne'e seidauk hasoru malu ho koordenadora timoroan ne'e, nia afirma
katak objetivu maka "mantein ninian kontratu hodi apoiu projetu ne'e".
Fonte ligada ho projetu ne'e
konfirma ba Lusa katak Antonieta de Jesus la partisipa iha reuniaun sira ne'ebé
relasiona ho projetu ne'e. Lusa la konsegue hetan komentariu ida hosi
koordenadora ne'e.
Rekorda mós katak, atualmente
funsiona eskola CAFE hamutuk 13 iha Timor-Leste, ida iha kada kapital munisipiu
12 nian no mós iha kapital Rejiaun Administrativa Espesial Oecusse-Ambenu
(RAEOA).
Eskola sira, ne'ebé maka konta ho
alunu sira hamutuk na'in 7.000, tuir kurikulu nasional no uza portuguéz hanesan
lian instrusaun nian iha nivel hotu eskolaridade nian.
Projetu ne'e mosu hosi "fó
edukasaun publika ida ho kualidade, ho uzu lian portugueza hodi hanorin iha
disiplina hotu-hotu", hodi fó "formasaun ho lian portugueza ba
universitariu resém-graduadu sira no ba profesor foun sira" no forma ho
reforsa kapasidade profesor no administradu hosi eskola publika lokal sira.
Projetu ne'e integra besik
profesor portuguéz sira na'in 130 no profesor sira 110 no profesor estajiariu
timoroan sira hamutuk na'in 62.
Anualmente adisiona turma tan
foun ida ba nivel eskolaridade seguinte no tinan ne'e CAFE sei iha turma sira
ensinu sekundariu nian ba dahuluk.
SAPO TL ho Lusa
Sem comentários:
Enviar um comentário