CBM “B” SAI KAMPIAUN IHA KOMPETISAUN VOLIBAL PRAIA SUB-23

DILI - Ekipa Com Beira Mar “B” (CBM) mane sai kampiaun iha kompetisaun Volibal da Praia wainhira halakon ekipa Universidade Nasional Timor-Lorosaé (UNTL)  ho set sigidu iha kampo Licedere Dili, loron domingu (14/06). Ekipa Com Beira Mar “B” ne’ebé kompostu husi jogador, Inocensio Fernandes Xavier ho Robson Fernandes Xavier konsege halakon ekipa Universidade Nasional Timor-Leste (UNTL) husi jogador Juliaun Vitor da Silva ho Andre Guterres ho skor 2-0 iha set sigidu, ne’ebé iha set permeiru CBM “B” manan ho skor 21-9 no set segundu manan ho skor 21-14.

Vensedor ba kompetisaun volibal da praia, premeiru lugar  ekipa Com Beira Mar “B” (CBM), segundu lugar ekipa UNTL, terseiru lugar ekipa Com Beira Mar “A” kompostu husi jogador Guido Fernandes Xavier ho Agustinho Antonio Gomes,  kuatru lugar ekipa Naroman Lifau kompostu husi jogador Ananias da Silva Colo ho Crissanto Antonio Siqueira.

Entertantu husi parte feto ekipa Lagoa Ira Lalaro sai permeiru vensedor wainhira halakon ekipa Com Beira Mar, ne’ebé iha jogu set permeiru ekipa Lagoa Ira Lalaro manan ho skor 21-11, no set segundu manan ho skor 21-19. Ekipa Lagoa Ira Lalaro sai hanesan permeiru lugar  iha kompetisaun volibal da Praia, kompostu husi jogador, Jenifer Sofia Correia do Lemos ho Alziza Caminha, segundu lugar ekipa CBM kompostu husi jogador Maria Dircia Corte Real ho Librata Fernandes Xavier, terseiru lugar ekipa Rimon kompostu husi jogador Georgina G. Morais ho Monica S. D. C. Ximenes, kuatru lugar ekipa Finantil kompostu husi jogador, Sonia Hipolito Isabel no Maria Elisa F. Belo.

Prezidente Federasaun Volibal Timor-Leste (FVTL) Inocensio de Araujo hatete, Premiu ba manan nain sira seidauk bele simu ohin, tanba jogu ne’e iha pakote ida, kompostu husi atividade volibal da praia no volibal open tuir kalendariu federasaun,  ne’e dunik manan nain volibal da praia sei simu premiu hamutuk ho volibal open iha jogu final dia 27 fulan Julhu.

Entertantu iha kompetisaun volibal da praia manan nain sei simu medalia, ekipamentus no osan, maibe konaba ba osan  Prezidente Federasaun dehan, agora seidauk bele fo sai. “Se lae sira ne’ebé jogu remata hakarak atu simu lalais, ne’e dunik osan ne’e sei fo anunsiu iha jogu final volibal open,”dehan nia.  Entertantu volibal Open sei realiza iha 27/06 no remata iha dia 17/07. (BT)

Business Timor - Abilio